इस्लामाबादमधील दहशतवादी हल्ल्यामागे भारताचा हात असल्याचा पाकिस्तानचे पंतप्रधान शेहबाज शरीफ यांनी केलेला आरोप भारताने मंगळवारी (११ नोव्हेंबर २०२५) ठामपणे फेटाळून लावला आहे. परराष्ट्र मंत्रालयाचे प्रवक्ते रणधीर जैस्वाल यांनी हे आरोप "आधारहीन आणि बिनबुडाचे" असल्याचे म्हटले असून, पाकिस्तानच्या "भ्रमनिरास झालेल्या" (delirious) नेतृत्वाची ही "खोट्या कथा रचण्याची" एक "अपेक्षित खेळी" (predictable tactic) आहे, असा टोला लगावला.
पाकिस्तानची राजधानी इस्लामाबादमधील एका न्यायालयाबाहेर झालेल्या आत्मघाती हल्ल्यात १२ जणांचा मृत्यू झाल्यानंतर काही तासांतच, पंतप्रधान शरीफ यांनी "भारताच्या पाठिंब्याने सक्रिय" असलेल्या गटांवर हा हल्ला केल्याचा आरोप केला होता.
या आरोपांवर प्रतिक्रिया देताना, परराष्ट्र मंत्रालयाचे प्रवक्ते रणधीर जैस्वाल म्हणाले, "भारत पाकिस्तानच्या नेतृत्वाकडून केले जाणारे हे आधारहीन आणि बिनबुडाचे आरोप स्पष्टपणे फेटाळून लावत आहे."
ते पुढे म्हणाले, "पाकिस्तानमध्ये सध्या सुरू असलेल्या 'लष्कर-प्रेरित घटनात्मक विध्वंस आणि सत्ता बळकावण्याच्या' (military-inspired constitutional subversion and power-grab) प्रक्रियेवरून स्वतःच्या जनतेचे लक्ष हटवण्यासाठी, भारतावर खोटेनाटे आरोप रचणे, हा पाकिस्तानचा एक जुनाच आणि अपेक्षित डाव आहे."
विशेष म्हणजे, शरीफ सरकारने नुकतीच 'चीफ ऑफ डिफेन्स फोर्सेस' हे नवीन पद निर्माण करण्यासाठी घटनादुरुस्ती आणली आहे, ज्यावरून पाकिस्तानमधील विरोधी पक्षांनी त्यांच्यावर जोरदार टीका केली आहे.
जैस्वाल यांनी स्पष्ट केले की, "आंतरराष्ट्रीय समुदायाला वास्तव काय आहे, हे चांगलेच ठाऊक आहे आणि पाकिस्तानच्या अशा निराशाजनक आणि लक्ष विचलित करणाऱ्या खेळींनी ते भरकटणार नाहीत."
दरम्यान, इस्लामाबाद हल्ल्याबाबत पाकिस्तान सरकारमध्येच मतभेद दिसून आले. पंतप्रधान शरीफ यांनी भारतावर आरोप केले असताना, पाकिस्तानचे संरक्षण मंत्री ख्वाजा आसिफ यांनी मात्र हा "अफगाण तालिबानने दिलेला संदेश" असल्याचे म्हटले आहे. तर, पाकिस्तानचे गृहमंत्री मोहसीन नक्वी यांनी सांगितले की, हल्लेखोर न्यायालय परिसरात घुसण्याचा प्रयत्न करत होता, पण अयशस्वी ठरल्याने त्याने प्रवेशद्वारावरच एका पोलीस वाहनाजवळ स्फोट घडवला.
