बॉलिवूड अभिनेता आमिर खान याने थ्री इडियट्स (3 Idiots) चित्रपटातील त्याचे प्रसिद्ध पात्र फुंसुक वांगडू हे पर्यावरणवादी कार्यकर्ते सोनम वांगचुक यांच्यावर आधारित नसल्याचे स्पष्ट केले आहे. लंडन इंडियन फिल्म फेस्टिव्हलमध्ये आमिरने या संदर्भात भाष्य केल्यानंतर विविध राजकीय पक्षांनी आणि सोशल मीडिया वापरकर्त्यांनी त्याच्यावर टीकेची झोड उठवली आहे.
आमिर खानने काय म्हटले?
आमिर खानने स्पष्ट केले की, २००९ मध्ये जेव्हा हा चित्रपट बनवला गेला, तेव्हा त्याला किंवा दिग्दर्शक राजकुमार हिराणी यांना सोनम वांगचुक यांच्याबद्दल माहिती नव्हती. "हे खरे नाही, हा एक गैरसमज आहे. त्यावेळी मला सोनम वांगचुक यांच्याबद्दल माहिती नव्हती. मात्र, सोनम जे कार्य करत आहेत ते नक्कीच कौतुकास्पद आहे. त्यांचा सन्मान करण्यासाठी किंवा त्यांच्या कार्याचे कौतुक करण्यासाठी त्यांना 'थ्री इडियट्स' मधील पात्राशी जोडण्याची गरज नाही," असे आमिरने म्हटले आहे.
नीट (NEET) परीक्षेतील कथित गैरव्यवहारांच्या विरोधात वांगचुक सुरू असलेल्या उपोषणाबद्दल बोलताना त्याने त्यांच्या आरोग्यासाठी चिंता व्यक्त करत, ते लवकर सुखरूप राहावेत अशी इच्छा व्यक्त केली.
राजकीय आणि सामाजिक पडसाद
आमिर खानच्या या स्पष्टीकरणानंतर राजकीय क्षेत्रातून तीव्र प्रतिक्रिया उमटल्या आहेत. आरजेडीचे खासदार मनोज झा यांनी आमिरच्या भूमिकेवर प्रश्नचिन्ह उपस्थित करत, "सत्तेसमोर ताठ कणा असणे सोपे नसते," असे म्हटले. काँग्रेस नेते हुसेन दलवाई यांनी आमिर खान 'भित्रा' असल्याचे म्हणत, त्याने नसीरुद्दीन शाह यांच्याकडून निर्भीडपणे बोलण्याचे धडे घ्यावेत, अशी टीका केली. तर 'आप'चे खासदार संजय सिंह यांनी, सध्याच्या मोदी सरकारसमोर सर्वजण झुकले असल्याचे म्हटले आहे.
प्रशांत भूषण आणि संजय झा यांसारख्या सामाजिक कार्यकर्त्यांनीही आमिरच्या या विधानावर सोशल मीडियावर टीका केली. अनेकांनी आमिरवर सोनम वांगचुक यांच्यापासून स्वतःला वेगळे करण्याचा आरोप लावला आहे. मात्र, या वादात आमिरच्या समर्थकांनीही सोशल मीडियावर आपली बाजू मांडली आहे.
राजकुमार हिराणी यांच्या एका जुन्या मुलाखतीचा संदर्भ देत, 'थ्री इडियट्स'मधील 'रांचो' हे पात्र एफटीआयआय (FTII) मधील एका विद्यार्थ्याच्या कथेवरून प्रेरित असल्याचे समर्थन चाहत्यांकडून केले जात आहे.
.jpeg)
