नवी दिल्ली
आसाम, मिझोरम आणि मणिपूरमध्ये एकाच वेळी केलेल्या धडक कारवाईत १८ जणांना अटक करण्यात आली असून १,४२४ बँक खाती गोठवण्यात आली आहेत. याद्वारे १०० कोटी रुपयांच्या हवाला व्यवहारांचा पर्दाफाश झाला असून, म्यानमारस्थित ड्रग्स लॉर्डच्या सिंडिकेटचे कंबरडे मोडण्यात आले आहे, अशी माहिती केंद्रीय गृहमंत्री अमित शाह यांनी रविवारी दिली.
केंद्रीय गृहमंत्री अमित शाह यांनी एक्सवर पोस्ट करत, आंतरराष्ट्रीय ड्रग्स कार्टेल उद्ध्वस्त करण्यासाठी २३ ऑक्टोबर रोजी 'ऑपरेशन त्रिशूल' (Operation Trident) राबवण्यात आल्याची माहिती दिली. या कारवाईत १०० कोटी रुपयांचे हवाला व्यवहार उघडकीस आले असून, १७.८२ कोटी रुपयांची संपत्ती जप्त करण्यात आली आहे. तसेच ५०० डेटोनेटर्स आणि १२ लाख रुपयांची रोख रक्कम जप्त करण्यात आली आहे.
हे नेटवर्क 'डेथ ट्रँगल कॉरिडोअर'च्या माध्यमातून भारत, म्यानमार आणि बांगलादेशच्या सीमांवर मादक पदार्थांची तस्करी करत होते. केंद्र आणि राज्य यंत्रणांच्या संयुक्त पथकाने ३८ ठिकाणी एकाच वेळी छापे टाकत ही धडक कारवाई केली. म्यानमारस्थित मुख्य सूत्रधार थांगसिंतुवाग याला यापूर्वीच मे महिन्यात अटक करण्यात आली होती. अंमली पदार्थ नियंत्रण ब्युरो (NCB), मिझोरम पोलीस आणि सक्तवसुली संचालनालय (ED) यांच्या संयुक्त तपासानंतर ही कारवाई करण्यात आली असून, ड्रग्स नेटवर्क पूर्णपणे समूळ नष्ट करण्याची सरकारची भूमिका असल्याचे शाह यांनी स्पष्ट केले आहे
.jpeg)
