ठाणे 

संजय गांधी राष्ट्रीय उद्यान (SGNP) परिसरातील जंगलात अवैध शिकारीसाठी गेलेल्या एका ६० वर्षीय व्यक्तीचा साथीदाराच्या बंदुकीतून सुटलेली गोळी लागून मृत्यू झाला आहे. मोबाईलचा टॉर्च प्राण्याचा डोळा समजून साथीदाराने गोळी झाडल्याची प्राथमिक माहिती समोर आली असून, याप्रकरणी पोलिसांनी दोघा जणांना अटक केली आहे.

मोबाईलचा लाईट प्राण्याचा डोळा समजून झाडली गोळी

मीरा भाईंदर वसई विरार (MBVV) पोलिसांनी दिलेल्या माहितीनुसार, मंगळवारी रात्री ठाणे जिल्ह्यातील संजय गांधी राष्ट्रीय उद्यानातील देबुचा घाट जंगलात सात जणांची एक टोळी वन्यजीवांच्या शिकारीसाठी गेली होती. त्यांच्याकडे डबल-बॅरल शॉटगन आणि गावठी बंदुका होत्या. अंधारात फिरत असताना आरोपी महेश गायकवाड याला एका ठिकाणाहून मोबाईलचा प्रकाश चमकताना दिसला. प्राण्याचा डोळा समजून त्याने त्या दिशेने गोळी झाडली.

ही गोळी विजय सापते (६०) यांच्या छातीत लागली, तर इतर दोन जणही गंभीर जखमी झाले. उपचारासाठी नेत असताना विजय सापते यांचा मृत्यू झाला. गुन्हा लपवण्यासाठी आरोपींनी मृतदेह तातडीने चेंगेगाव स्मशानभूमीत जाळून टाकला. तसेच व्हॉट्सअॅप व्हिडिओ कॉल करून एका खाजगी डॉक्टरांकडून मृत्युपत्र मिळवल्याचे तपासात निष्पन्न झाले आहे. काशिगाव पोलिसांनी याप्रकरणी गुन्हा दाखल करत महेश गायकवाड आणि कथोड बिस्तूर लाबाद या दोघांना अटक केली असून इतर आरोपींचा शोध सुरू आहे.