पाकिस्तानच्या अशांत बलुचिस्तान प्रांताची राजधानी क्वेट्टा येथे मंगळवारी रात्री एका राजकीय रॅलीवर झालेल्या आत्मघातकी बॉम्बस्फोटात किमान १४ जण ठार झाले असून ३० हून अधिक जण जखमी झाले आहेत.
अधिकाऱ्यांनी दिलेल्या माहितीनुसार, हा हल्ला बलुचिस्तान नॅशनल पार्टीच्या (BNP) रॅलीनंतर झाला. पक्षाचे संस्थापक आणि राष्ट्रवादी नेते सरदार अताउल्ला मेंगल यांच्या पुण्यतिथीनिमित्त शेकडो कार्यकर्ते येथील शाहवानी स्टेडियमच्या पार्किंग परिसरात जमले होते, तेव्हा एका आत्मघातकी हल्लेखोराने स्वतःला उडवून दिले.
सरकारी अधिकारी हमजा शफात यांनी सांगितले की, रॅली संपल्यानंतर लोक पार्किंगमधून बाहेर पडत असताना हा स्फोट झाला. या हल्ल्यात जखमी झालेल्या अनेकांची प्रकृती गंभीर असल्याने मृतांचा आकडा वाढण्याची भीती व्यक्त केली जात आहे.
या रॅलीत उपस्थित असलेले सरदार अताउल्ला मेंगल यांचे पुत्र सरदार अख्तर मेंगल सुखरूप असल्याचे सांगण्यात आले. मात्र, पक्षाचे अनेक कार्यकर्ते आणि नेते या हल्ल्यात जखमी झाले आहेत.
बलुचिस्तानचे मुख्यमंत्री सर्फराज बुग्ती यांनी या हल्ल्याचा तीव्र निषेध करत याला 'मानवतेच्या शत्रूंचे भ्याड कृत्य' म्हटले आहे. अद्याप कोणत्याही दहशतवादी संघटनेने या हल्ल्याची जबाबदारी स्वीकारलेली नाही. बलुचिस्तानमध्ये फुटीरतावादी आणि इस्लामी दहशतवादी गट दोन्ही सक्रिय असून, या प्रदेशात हिंसाचाराच्या घटना वारंवार घडत असतात.
.jpg "मणिपूरमधील बंदचे एक दृश्य")
.jpg "अफगाणिस्तानमधील भूकंपग्रस्तांसाठी भारताने पाठवलेली एक हजार तंबूंची मदत")
