पाकिस्तान आणि अफगाणिस्तानमधील ४८ तासांचा तात्पुरता युद्धविराम संपताच, पाकिस्तानने अफगाणिस्तानच्या पक्तिका प्रांतावर हवाई हल्ले (Airstrikes) केले आहेत. या हल्ल्यांमध्ये सामान्य नागरिकांच्या रहिवासी घरांना लक्ष्य करण्यात आल्याचा आरोप तालिबानने केला असून, "इस्लामाबादने शांतता करार मोडला आहे आणि अफगाणिस्तान याचा बदला घेईल," असा थेट इशारा दिला आहे.

एका तालिबानी अधिकाऱ्याने या हल्ल्यांची पुष्टी केली. त्यांच्या मते, अरगुन आणि बरमल जिल्ह्यांमधील घरांवर हे हल्ले झाले आहेत. या घटनेमुळे दोन्ही देशांमधील संबंध पुन्हा एकदा अत्यंत तणावपूर्ण झाले आहेत.

काही दिवसांपूर्वी काबूलमध्ये झालेल्या बॉम्बस्फोटांनंतर दोन्ही देशांमध्ये संघर्ष उफाळून आला होता. त्यानंतर सौदी अरेबिया आणि कतारच्या मध्यस्थीने ४८ तासांचा युद्धविराम लागू करण्यात आला होता, जो वाढवला जाईल अशी अपेक्षा होती. मात्र, या हवाई हल्ल्यांमुळे शांततेचे प्रयत्न धुळीला मिळाले आहेत.

या संघर्षाच्या मुळाशी पाकिस्तानचा आरोप आहे की, अफगाणिस्तान 'तहरीक-ए-तालिबान पाकिस्तान' (TTP) च्या दहशतवाद्यांना आश्रय देत आहे. मात्र, काबूलने हे आरोप सातत्याने फेटाळून लावले आहेत. आता पाकिस्तानच्या या थेट कारवाईमुळे, तालिबानने प्रत्युत्तराची घोषणा केल्याने, दक्षिण आशियात पुन्हा एकदा युद्धाचे ढग दाटून आले आहेत.