इस्लामिक स्टेटचा प्रसार करणाऱ्यांच्या ‘अशा’ आवळल्या मुसक्या

Story by आवाज़ मराठी | Published by Fazal Pathan • 5 h ago

प्रातिनिधिक चित्र

राष्ट्रीय तपास यंत्रणेने (एनआयए) बुधवारी तमिळनाडूत चार जणांना अटक केली. इस्लामिक स्टेट स्थापन्यासाठी सशस्त्र संघर्षाला प्रोत्साहन देणाऱ्या कट्टरपंथी गटांविरुद्ध ही कारवाई आहे. “आरोपींनी खिलाफत विचारधारा आणि जिहादद्वारे शहादतला प्रोत्साहन दिलं,” असं एनआयएच्या अधिकृत निवेदनात म्हटलं आहे.

अटक केलेले आरोपी अहमद अली, जवाहर सथिक, राजा अब्दुल्ला ऊर्फ मॅक राजा आणि शेख दावूद यांना जामील बाशा याने कट्टरपंथी बनवलं. बाशा हा कोयंबटूरमधील मद्रास अरेबिक कॉलेजचा संस्थापक आहे. “बाशा आणि त्याच्या साथीदारांनी अरबी भाषा शिकवण्याच्या नावाखाली तरुणांना भडकवून सलाफी-जिहादी विचारधारा रुजवली,” असं एनआयएने सांगितलं. यापूर्वी बाशा आणि त्याचे साथीदार इर्शाथ, सय्यद अब्दुर रहमान आणि मोहम्मद हुसेन यांना अटक करून दोषारोपपत्र दाखल झालं आहे.

“आरोपींनी वर्गखोल्या आणि सामाजिक मंचांचा वापर करून राष्ट्रविरोधी कट्टरपंथी आणि भरतीचे उपक्रम राबवले,” असं एनआयएने नमूद केलं. या कट्टरपंथी कारवायांमुळे ऑक्टोबर २०२२ मध्ये कोयंबटूरमधील कार बॉम्बस्फोट घडला. या हल्ल्यात आत्मघाती हल्लेखोर जमीशा मुबीन याने प्राचीन मंदिरासमोर वाहनातून स्फोटक हल्ला केला, असं तपासात उघड झालं.

“लोकशाही सरकार उलथवून इस्लामिक स्टेट स्थापन्यासाठी हिंसाचार आणि सशस्त्र संघर्षाला प्रोत्साहन देणं हा या गटाचा उद्देश होता,” असं एनआयएच्या निवेदनात स्पष्ट झालं. या प्रकरणात आतापर्यंत एकूण आठ जणांना अटक झाली आहे. कोयंबटूरमधील स्फोटाशी संबंधित कट्टरपंथी जाळं उद्ध्वस्त करण्यासाठी एनआयएचा तपास सुरू आहे.

एनआयएने यापूर्वी बाशा आणि त्याच्या साथीदारांवर अरबी शिक्षणाच्या आड कट्टरपंथी विचारधारा पसरवल्याचा आरोप ठेवला होता. “राष्ट्राच्या सुरक्षेला धोका निर्माण करणाऱ्या कट्टरवादी कारवायांना आळा घालण्यासाठी तपास पुढे चालू आहे,” असं एनआयएने सांगितलं.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter