डोनाल्ड ट्रम्प यांनी इराणला दिला ‘हा’ इशारा

Story by आवाज़ मराठी | Published by Fazal Pathan • 7 h ago

प्रातिनिधिक चित्र

अमेरिकेचे राष्ट्राध्यक्ष डोनाल्ड ट्रम्प यांनी बुधवारी सांगितलं, “इराणशी युद्ध नको, पण त्यांचा अण्वस्त्र कार्यक्रम रोखण्यासाठी गरज पडल्यास कारवाई करू.” इराणच्या सर्वोच्च नेत्यांनी अमेरिकेच्या हल्ल्याला तीव्र प्रत्युत्तर देण्याचा इशारा दिला आहे, अशात ट्रम्प यांनी ही ठाम भूमिका मांडली.

“इराणने अण्वस्त्र कार्यक्रम सोडावा, अजून वेळ गेलेली नाही,” असं ट्रम्प व्हाइट हाऊसमध्ये पत्रकारांशी बोलताना म्हणाले. “पुढील आठवडा महत्त्वाचा आहे,” असंही त्यांनी नमूद केलं. इराणच्या सर्वोच्च नेते आयातुल्ला अली खामेनेई यांनी ट्रम्प यांच्या बिनशर्त शरणागतीच्या मागणीला नकार दिला. “अमेरिकेचा हल्ला झाल्यास अपूरणीय नुकसान होईल,” असं खामेनेई म्हणाले. यावर ट्रम्प यांनी, “त्यांना शुभेच्छा,” असं संक्षिप्त उत्तर दिलं.

ट्रम्प यांनी मंगळवारी सांगितलं, “खामेनेई कुठे लपलेत हे आम्हाला माहिती आहे, पण सध्या त्यांना ठार करणार नाही.” इराणच्या ९५ लाख रहिवाशांना सुरक्षित स्थळी जाण्याचा सल्ला देत त्यांनी जी-७ परिषद अर्धवट सोडली. “इराणचे अधिकारी व्हाइट हाऊसशी संपर्क साधताहेत, कारण इस्त्रायलकडून त्यांना जोरदार प्रत्युत्तर मिळतंय,” असं ट्रम्प म्हणाले. पण इराणच्या संयुक्त राष्ट्र मिशनने हा दावा फेटाळला. “कोणत्याही इराणी अधिकाऱ्याने व्हाइट हाऊसमध्ये येण्याची विनंती केलेली नाही,” असं त्यांनी स्पष्ट केलं.

संरक्षणमंत्री पीट हेगसेथ यांनी बुधवारी सांगितलं, “पेंटागॉन ट्रम्प यांना इराणवरील पर्याय सुचवत आहे.” ट्रम्प यांनी रशियाचे राष्ट्राध्यक्ष व्लादिमीर पुतिन यांनी दिलेल्या मध्यस्थीच्या प्रस्तावाला नकार दिला. “व्लादिमीर, आधी युक्रेनमधील तुझं युद्ध मिटव,” असं ट्रम्प पुतिन यांना म्हणाले. रशियाच्या उपपरराष्ट्रमंत्र्यांनी अमेरिकेला इस्त्रायलला थेट लष्करी मदत देण्याविरुद्ध इशारा दिला आहे.

इराण आणि रशियाचे संबंध २०२२ मध्ये युक्रेन युद्धानंतर वाढले. इराणने रशियाला ड्रोन आणि क्षेपणास्त्रं पुरवली, असं अमेरिकी गुप्तचर यंत्रणांनी सांगितलं. “इराणचा अण्वस्त्र कार्यक्रम हा जागतिक सुरक्षेला धोका आहे,” असं ट्रम्प म्हणाले. पण युद्ध टाळण्यासाठी संवादाला प्राधान्य देण्याचं त्यांनी सूचित केलं.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter