मुहर्रमच्या तयारीत कोणतीही कसर ठेवणार नाही

मुहर्रमच्या तयारीत कोणतीही कसर ठेवणार नाही - ओमर अब्दुल्ला

Story by आवाज़ मराठी | Published by Fazal Pathan • 6 h ago

जम्मू काश्मीरचे मुख्यमंत्री उमर अब्दुल्ला यांनी मुहर्रमच्या तयारीसाठी बैठक घेतली.

जम्मू-काश्मीरचे मुख्यमंत्री ओमर अब्दुल्ला यांनी बुधवारी मुहर्रमच्या तयारीसाठी उच्चस्तरीय बैठक घेतली. “मुहर्रमसाठी सर्व व्यवस्था कार्यक्षम आणि काळजीपूर्वक करू,” असं त्यांनी ठामपणे सांगितलं. या बैठकीत शिया आणि इतर धार्मिक संघटनांचे प्रमुख, आमदार, मुख्य सचिव अतुल दुल्लू, मंत्र्यांचे सल्लागार नासिर अस्लम वाणी आणि वरिष्ठ प्रशासकीय आणि पोलीस अधिकारी उपस्थित होते.

मुहर्रमचे धार्मिक विधी दोन महिने आणि आठ दिवस चालतात. “प्रशासनाने फक्त पहिल्या १० दिवसांवरच लक्ष केंद्रित करू नये, तर संपूर्ण कालावधीत सतर्क राहावं,” असंही ते म्हणाले.

यंदा मुहर्रम आणि अमरनाथ यात्रा एकाच वेळी येत असल्याने प्रशासनावर जबाबदारी वाढली आहे. “दोन्ही कार्यक्रम निर्विघ्नपणे पार पडावेत यासाठी विशेष नियोजन हवं,” असं अब्दुल्ला म्हणाले. त्यांनी सचिव स्तरावरील स्वतंत्र नोडल अधिकाऱ्याची नियुक्ती जाहीर केली. हा अधिकारी विभागांमधील समन्वय साधेल आणि मुहर्रमच्या तयारीवर देखरेख ठेवेल.

अब्दुल्ला यांनी पाणी, वीज आणि रेशनच्या पुरवठ्यावर लक्ष केंद्रित केलं. “पाण्याच्या टँकर आणि साठवण टाक्यांचा वापर करून पाणीपुरवठा खंडित होणार नाही,” असं त्यांनी सांगितलं. वीज विभागाला अखंडित वीज आणि मोठ्या मिरवणूक ठिकाणी हाय-मास्ट लाइट्स लावण्याचे निर्देश दिले. अन्न विभाग आणि FCI ला रेशन वेळेवर उपलब्ध करण्याचं सांगण्यात आलं.

नगरपालिका आणि आरोग्य विभागाला स्वच्छता मोहीम तीव्र करण्यास आणि आरोग्य सुविधा उपलब्ध ठेवण्यास सांगितलं. अग्निशमन सेवांना मिरवणूक परिसर स्वच्छ करण्यासाठी उच्च दाबाच्या पाण्याच्या तोफांचा वापर करण्याचे निर्देश मिळाले. “नोडल अधिकारी सर्व विभाग आणि जिल्ह्यांशी समन्वय ठेवून नियमित अहवाल देईल,” असं अब्दुल्ला म्हणाले.

काश्मीरचे विभागीय आयुक्त यांनी मुहर्रमच्या तयारीचा तपशील सादर केला. यात शिया-बहुल भागातील वीज, पाणी, रेशन, स्वच्छता आणि पायाभूत सुविधांचा समावेश होता. आमदार आणि धार्मिक नेत्यांनी रस्ते दुरुस्ती, रस्त्यावरील प्रकाश आणि इतर सुविधांबाबत सूचना दिल्या.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter