"भारत लवकरच क्रीडा साहित्याच्या निर्मितीचे जागतिक केंद्र बनेल," असा विश्वास केंद्रीय क्रीडामंत्री मनसुख मांडविया यांनी शनिवारी व्यक्त केला. वर्षाअखेरीस देशात एक विशेष 'क्रीडा साहित्य निर्मिती धोरण' (sports goods manufacturing policy) लागू केले जाईल, ज्यामुळे केवळ देशातील क्रीडा प्रतिभांनाच प्रोत्साहन मिळणार नाही, तर भारत जागतिक स्तरावर क्रीडा साहित्याचा एक प्रमुख निर्यातदार म्हणूनही उदयास येईल, असे ते म्हणाले.
अनेक खेळांमधील खेळाडूंना उच्च स्तरावर स्पर्धा करण्यासाठी महागड्या आयात केलेल्या उपकरणांवर अवलंबून राहावे लागते. यावर बोलताना मनसुख मांडविया म्हणाले की, "या वर्षी नोव्हेंबर-डिसेंबरपर्यंत एक अशी योजना सुरू केली जाईल, जी देशातील क्रीडा साहित्य आणि उपकरणांच्या निर्मितीला मोठ्या प्रमाणात चालना देईल."
नवी दिल्लीत आयोजित एका परिषदेत मनसुख मांडविया म्हणाले, "आपल्या देशात प्रत्येक गोष्ट साध्य करण्याची क्षमता आहे. क्रीडा औषधे, क्रीडा पायाभूत सुविधा आणि क्रीडा शिक्षण डिझाइन यांनाही आपण क्रीडा साहित्य निर्मितीचा भाग बनवू शकतो. जीएसटीसारखी काही आव्हाने आहेत, त्यासाठी आपण एक टास्क फोर्स बनवून क्रीडा निर्मितीसाठी नवीन योजना आणि धोरणे आखली पाहिजेत."
मनसुख मांडविया यांनी सांगितले की, क्रीडा साहित्य निर्मिती क्षेत्राला चालना देण्यासाठी सरकार कटिबद्ध आहे आणि उत्पादन व निर्यात वाढवण्यासाठी सर्व संबंधित घटकांशी चर्चा करून एक मार्ग तयार केला जाईल. "निती आयोग आणि उत्पादकांसह सर्व संबंधित घटकांशी चर्चा करूनच धोरणे बनवली जातील. धोरण तयार करण्याचे काम सप्टेंबरपर्यंत पूर्ण होईल," असेही त्यांनी नमूद केले.
