अमेरिकेचे माजी राष्ट्रीय सुरक्षा सल्लागार जेक सुलिवन यांनी राष्ट्राध्यक्ष डोनाल्ड ट्रम्प यांच्या व्यापारी धोरणांवर अत्यंत कठोर शब्दांत टीका केली आहे. "जगातील नेते आता अमेरिकेकडे एक 'मोठा विघटनकर्ता' (big disruptor) म्हणून पाहत आहेत आणि अमेरिका हा आता 'विश्वास ठेवण्याजोगा' देश राहिलेला नाही," असे म्हणत सुलिवन यांनी ट्रम्प प्रशासनाला घरचा आहेर दिला आहे.
भारतासारख्या मित्र देशांवर लादलेल्या कठोर व्यापारी शुल्कांच्या (tariffs) पार्श्वभूमीवर सुलिवन यांचे हे विधान अत्यंत महत्त्वाचे मानले जात आहे.
एका मुलाखतीत बोलताना जेक सुलिवन म्हणाले की, "राष्ट्राध्यक्ष ट्रम्प यांच्या लहरी आणि एकतर्फी निर्णयामुळे अमेरिकेची जागतिक स्तरावरची विश्वासार्हता धोक्यात आली आहे. भारतासारख्या लोकशाहीवादी आणि महत्त्वाच्या भागीदार देशावर अशा प्रकारे शुल्क लादणे हे केवळ अविचारी नाही, तर ते अमेरिकेच्याच हिताला बाधा पोहोचवणारे आहे."
सुलिवन यांनी पुढे सांगितले की, "या धोरणांमुळे अनेक वर्षांच्या मुत्सद्देगिरीवर पाणी फेरले जात आहे. भारतासारख्या देशांना चीन आणि रशियाच्या जवळ ढकलण्याचे काम ट्रम्प यांचे धोरण करत आहे, जे अमेरिकेसाठी धोकादायक ठरू शकते."
डोनाल्ड ट्रम्प यांनी भारताने रशियाकडून तेल खरेदी केल्याच्या कारणावरून भारतीय मालावर ५०% पर्यंत शुल्क वाढवले आहे. या निर्णयावर भारतातून तीव्र प्रतिक्रिया उमटत असतानाच, आता अमेरिकेच्याच माजी वरिष्ठ अधिकाऱ्याने त्यावर प्रश्नचिन्ह उपस्थित केल्याने ट्रम्प प्रशासनावरील दबाव वाढला आहे.
सुलिवन यांच्या या टीकेमुळे अमेरिकेच्या राजकीय वर्तुळातही खळबळ उडाली असून, ट्रम्प यांच्या 'अमेरिका फर्स्ट' धोरणामुळे अमेरिका जगात एकटी पडत असल्याची भावना अधिक दृढ होत आहे.
.jpg "जपानी मान्यवरांना अभिवादन करताना पंतप्रधान मोदी")