जम्मू-काश्मीरमध्ये सुरू असलेल्या मुसळधार पावसाने पुन्हा एकदा मोठे संकट ओढवले आहे. रियासी जिल्ह्यातील महोर परिसरात शुक्रवारी सकाळी दरड कोसळून एक निवासी घर पूर्णपणे गाडले गेले. या भीषण दुर्घटनेत अनेक जण ठार झाले असून, काही जण जखमी झाले आहेत, तर अनेक जण अजूनही बेपत्ता असल्याची माहिती आहे.
अधिकाऱ्यांनी दिलेल्या माहितीनुसार, मुसळधार पावसामुळे महोर भागातील जमीन भुसभुशीत झाली होती, ज्यामुळे ही दरड कोसळली. या दरडीखाली एक संपूर्ण घर दबले गेले, ज्यात अनेक जण राहत होते. घटनेची माहिती मिळताच लष्कर, पोलीस आणि स्थानिक प्रशासनाने तातडीने बचावकार्य सुरू केले आहे.
ढिगाऱ्याखालून मृतदेह बाहेर काढण्याचे आणि जखमींना रुग्णालयात पोहोचवण्याचे काम युद्धपातळीवर सुरू आहे. मात्र, सततच्या पावसामुळे आणि दुर्गम भागामुळे बचावकार्यात मोठे अडथळे येत आहेत.
जम्मू-काश्मीरचे मुख्यमंत्री उमर अब्दुल्ला यांनी या दुर्घटनेवर तीव्र दुःख व्यक्त केले असून, ते सतत परिस्थितीवर लक्ष ठेवून आहेत. त्यांनी प्रशासनाला बचावकार्य अधिक तीव्र करण्याचे आणि पीडितांना शक्य ती सर्व मदत पुरवण्याचे निर्देश दिले आहेत.
या आठवड्यात जम्मूत पावसाने मोठे नुकसान केले आहे. यापूर्वी वैष्णोदेवी यात्रा मार्गावरही दरड कोसळून अनेक भाविकांना आपले प्राण गमवावे लागले होते. आता रियासीमधील या नव्या दुर्घटनेमुळे संपूर्ण प्रदेशात भीतीचे आणि चिंतेचे वातावरण आहे.
