नवी दिल्ली
राष्ट्रपती द्रौपदी मुर्मू यांनी सोमवारी देशातील विविध राज्यांसाठी सहा नवीन राज्यपालांच्या नियुक्त्या जाहीर केल्या आहेत. यामध्ये केरळचे राज्यपाल राजेंद्र विश्वनाथ अर्लेकर यांची तामिळनाडूच्या राज्यपालपदी बदली करण्यात आली आहे, तर सिक्कीमचे राज्यपाल ओ. पी. माथूर यांची केरळचे नवे राज्यपाल म्हणून नियुक्ती करण्यात आली आहे.
राष्ट्रपती भवनाकडून जारी करण्यात आलेल्या निवेदनानुसार, राजेंद्र विश्वनाथ अर्लेकर यांनी २ जानेवारी २०२५ रोजी केरळचे राज्यपाल म्हणून शपथ घेतली होती आणि यावर्षी १२ मार्चपासून त्यांच्याकडे तामिळनाडूचा अतिरिक्त कार्यभारही होता. आता त्यांची पूर्णवेळ तामिळनाडूच्या राज्यपालपदी नियुक्ती करण्यात आली आहे, तर त्यांच्या जागी ओ. पी. माथूर हे केरळची धुरा सांभाळतील. माथूर यांची २७ जुलै २०२४ रोजी सिक्कीमचे राज्यपाल म्हणून नियुक्ती झाली होती.
या फेरबदलांसोबतच राष्ट्रपतींनी चार नवीन राज्यपालपदांच्या नियुक्त्यांनाही मंजुरी दिली आहे. यामध्ये भाजपचे ज्येष्ठ नेते दुष्यंत गौतम (सिक्कीम), सुधा यादव (कर्नाटक), ढालसिंह बिसेन (उत्तराखंड) आणि ब्रजमोहन राम (ओडिशा) यांच्या नावांचा समावेश आहे. हे सर्व नवे राज्यपाल विविध राज्यांमधून असून त्यांच्याकडे दीर्घकालीन राजकीय व संघटनात्मक अनुभव आहे. हे सर्वजण आपापल्या पदाची सूत्रे स्वीकारल्याच्या दिवसापासून कार्यभार हाती घेतील.
.jpeg)
