संयुक्त राष्ट्र 

संयुक्त राष्ट्र सुरक्षा परिषदेत (UNSC) पश्चिम आशियातील वाढत्या तणावावर भारताने तीव्र चिंता व्यक्त केली आहे. सौदी अरेबियातील विमानतळांवरील हल्ले आणि व्यापारी जहाजांना लक्ष्य करण्याच्या घटनांचा भारताने तीव्र निषेध केला असून, नागरिकांच्या सुरक्षेसाठी संवादावर भर दिला आहे.

संयुक्त राष्ट्र सुरक्षा परिषदेच्या पश्चिम आशियातील परिस्थितीवरील बैठकीत बोलताना संयुक्त राष्ट्रातील भारताचे स्थायी प्रतिनिधी हरीश पर्वतानेनी यांनी स्पष्ट केले की, मध्यपूर्वेतील सुरक्षा आणि स्थैर्यामध्ये भारताचे मोठे हितसंबंध आहेत. या भागातील लोकांना सामान्य जीवन आणि शाश्वत शांततेची गरज असून, भारत नेहमीच संवादाच्या बाजूने उभा आहे.

व्यापारी जहाजांच्या सुरक्षेवर भारताचा भर

नुकत्याच झालेल्या हल्ल्यांचा संदर्भ देत पर्वतानेनी म्हणाले की, व्यापारी जहाजे, खलाशी आणि नागरी पायाभूत सुविधांवरील हल्ले कायदेशीर आणि नैतिकदृष्ट्या अयोग्य आहेत. भारताच्या मालकीची किंवा भारतीय खलाशी असलेली जहाजे लक्ष्य केली जात असून, त्यांच्या सुरक्षेची जबाबदारी आमची आहे. ओमान आणि संयुक्त अरब अमिरातीच्या प्रशासनाने भारतीय खलाशांच्या सुरक्षेसाठी केलेल्या मदतीबद्दल भारताने आभार मानले आहेत. आंतरराष्ट्रीय जलमार्ग आणि सागरी व्यापाराची स्वातंत्र्य व सुरक्षा कायम राखली पाहिजे, असे भारताने पुनरच्चारले.

पॅलेस्टाईन, येमेन आणि लेबनॉनबाबत स्पष्ट भूमिका

गाझा पट्टीतील मानवनिर्मित संकटावर लक्ष केंद्रित करताना भारताने द्वि-राष्ट्र सोल्युशनला (Two-State Solution) पाठिंबा दिला आहे. पॅलेस्टाईन निर्वासितांसाठीच्या UNRWA संस्थेला भारताने आतापर्यंत ५२ दशलक्ष डॉलर्सहून अधिक मदत दिली आहे. तसेच लेबनॉनमधील UNIFIL शांतता सैनिकांवर होणारे हल्ले अस्वीकार्य असून त्यांच्या सुरक्षेला प्राधान्य दिले पाहिजे, असे भारताने स्पष्ट केले.