नवी दिल्ली 

भारताच्या प्राचीन सांस्कृतिक वारशावर आणि जागतिक पातळीवरील सभ्यतात्मक संबंधांवर प्रकाश टाकणारी तीन दिवसीय 'बृहत्तर भारत' आंतरराष्ट्रीय परिषद उद्यापासून (१४ ते १६ ऑक्टोबर) नवी दिल्लीत सुरू होत आहे. इंदिरा गांधी राष्ट्रीय कला केंद्रात (IGNCA) आयोजित या मेगा कॉन्फरन्समध्ये जगातील ५० देशांमधील ५० हून अधिक शिष्टमंडळ, राजदूत आणि विद्वान सहभागी होणार आहेत.

'बृहत्तर भारत परिषदे'ची ऐतिहासिक पार्श्वभूमी

ही परिषद 'बृहत्तर भारत परिषदेच्या' (Greater India Society) शतकमहोत्सवाचे औचित्य साधून आयोजित केली जात आहे. १४ ऑक्टोबर १९२६ रोजी कोलकत्ता येथे या संस्थेची स्थापना करण्यात आली होती, ज्याचे आध्यात्मिक मार्गदर्शक नोबेल विजेते रवींद्रनाथ टागोर हे होते. केंद्रीय संस्कृती मंत्री गजेंद्र सिंह शेखावत विज्ञान भवनात या परिषदेचे उद्घाटन करणार असून, पंतप्रधान नरेंद्र मोदी यांचा विशेष व्हिडिओ संदेश या उद्घाटन सत्रात प्रसारित केला जाणार आहे.

आशियाई देशांसोबत सामायिक सांस्कृतिक वारशाचे प्रदर्शन

या परिषदेदरम्यान 'कॉमन कल्चरल हेरिटेज ऑफ आशिया' नावाचे विशेष प्रदर्शनही भरवले जाईल. यात भारत आणि इतर आशियाई देशांमधील ऐतिहासिक सांस्कृतिक संबंधांचे दर्शन घडवले जाईल. दक्षिण पूर्व आशिया, पूर्व आशिया, मध्य आशिया, पश्चिम आशिया, युरोप आणि दक्षिण आशियातील सांस्कृतिक देवाणघेवाणीवर यात प्रामुख्याने चर्चा होईल. प्रारंभिक संबंध, धार्मिक परंपरा, तत्त्वज्ञान आणि व्यापार यांसारख्या दहा प्रमुख विषयांवर या चर्चा केंद्रित असतील. युनेस्कोच्या 'मेमरी ऑफ द वर्ल्ड' कार्यक्रमासाठी संयुक्त नामांकने आणि आगामी 'बृहत्तर भारत पोर्टल'च्या माध्यमातून सामायिक वारशाचे जतन व प्रचार करण्यावर या परिषदेत भर दिला जाणार आहे.