खीर भवानी उत्सवानिमित्त मुख्यमंत्री उमर अब्दुल्लांनी दिल्या शुभेच्छा

Story by आवाज़ मराठी | Published by Bhakti Chalak • 2 d ago

खीर भवानी उत्सवाला मुख्यमंत्री उमर अब्दुल्लांची हजेरी

जम्मू-काश्मीरचे उपराज्यपाल मनोज सिन्हा आणि मुख्यमंत्री उमर अब्दुल्ला यांनी सोमवारी २ जून २०२५ रोजी मेला खीर भवानी निमित्त जनतेला शुभेच्छा दिल्या. मंगळवारी ज्येष्ठ अष्टमीला हा उत्सव साजरा होत आहे. उमर यांनी विस्थापित काश्मिरी पंडित समुदाय सन्मान आणि प्रतिष्ठेनं खोऱ्यात परत येईल, अशी आशा व्यक्त केली.

सिन्हा म्हणाले, “ज्येष्ठ अष्टमीच्या पवित्र प्रसंगी मी सर्वांना, विशेषतः काश्मिरी पंडित बंधू-भगिनींना हार्दिक शुभेच्छा देतो. माता खीर भवानीचा आशीर्वाद आपल्या मार्गात प्रकाश टाको, सर्वांना शांती, सुख आणि समृद्धी मिळो. या पवित्र प्रसंगाचा आत्मा बंधुभाव वाढवो, समुदायांमध्ये सौहार्द आणि परस्पर आदर वाढवो.”

“या शुभदिनी आपण राष्ट्रसेवा आणि जनकल्याणासाठी स्वतःला समर्पित करू,” असंही ते म्हणाले (PTI न्यूज एक्स पोस्ट).

मुख्यमंत्री उमर अब्दुल्ला यांनीही जनतेला शुभेच्छा दिल्या. “मेला खीर भवानी हा सांप्रदायिक सौहार्द आणि बंधुभावाचं प्रतीक आहे. जम्मू-काश्मीरच्या समृद्ध बहु-सांस्कृतिक परंपरेचं हे द्योतक आहे,” असं त्यांनी सांगितलं.

हा उत्सव एकतेच्या भावनेला आणि सांस्कृतिक वारशाला बळकट करतो, असं अब्दुल्ला यांनी नमूद केलं. “मी राज्यात शांती, सौहार्द, प्रगती आणि समृद्धीसाठी प्रार्थना करतो. सर्वांनी मिळून परस्पर आदर आणि एकतेचे जुन्या बंधनांना मजबूत करावं,” असं त्यांनी आवाहन केलं.

मेला खीर भवानी समुदायांमधील सौहार्दाचं उत्तम उदाहरण आहे, असं अब्दुल्ला म्हणाले. “शांतता परतल्याने काश्मिरी पंडित सन्मान आणि प्रतिष्ठेनं आपल्या मायभूमीत परत येतील. खोऱ्याच्या सामाजिक-सांस्कृतिक रचनेत त्यांचं योग्य स्थान पुन्हा मिळेल,” असं त्यांनी सांगितलं.