मुंबई 

मुंबई पोलिसांनी २० ते २२ ऑक्टोबर दरम्यान होणाऱ्या दुर्गा विसर्जनाच्या पार्श्वभूमीवर एक महत्त्वाचा प्रतिबंधात्मक आदेश जारी केला आहे. या आदेशानुसार, विसर्जनादरम्यान पाण्यात तरंगणाऱ्या किंवा अर्ध्या विरघळलेल्या (half-submerged) दुर्गा मूर्तींचे छायाचित्र काढणे, व्हिडिओ शूट करणे आणि ते सोशल मीडियावर किंवा इतरत्र प्रसारित करण्यावर कडक बंदी घालण्यात आली आहे.

आदेशामागचे कारण आणि पार्श्वभूमी

पोलिसांच्या म्हणण्यानुसार, शहरभरातील विविध जलस्रोतांमध्ये २० ते २२ ऑक्टोबर दरम्यान देवी दुर्गाच्या मूर्तींचे विसर्जन केले जाईल. विसर्जनानंतर अनेकदा भरतीच्या वेळी किंवा पाण्याचा प्रवाह बदलल्यामुळे काही अर्धवट विरघळलेल्या मूर्ती किनाऱ्यावर येतात किंवा पाण्याच्या पृष्ठभागावर तरंगतात. त्यानंतर बृहन्मुंबई महानगरपालिकेचे (BMC) कर्मचारी या मूर्ती बाहेर काढून पुन्हा विसर्जनासाठी नेतात.

अशा न विरघळलेल्या किंवा अर्ध्या विरघळलेल्या मूर्तींचे किंवा महापालिका कर्मचाऱ्यांच्या वतीने त्या बाहेर काढण्याच्या प्रक्रियेचे फोटो व व्हिडिओ सोशल मीडियावर फिरल्यामुळे नागरिकांच्या धार्मिक भावना दुखावू शकतात आणि त्यामुळे कायदा व सुव्यवस्थेचा प्रश्न निर्माण होऊ शकतो. ही संभाव्य परिस्थिती टाळण्यासाठी आणि सार्वजनिक शांतता टिकवून ठेवण्यासाठी भारतीय नागरिक सुरक्षा संहिता (BNSS) २०२३ च्या कलम १६३ अंतर्गत पोलीस उपआयुक्त (परिमंडळ/कारवाई) अकबर पठाण यांनी हा आदेश जारी केला आहे.