मोहर्रममध्ये नव्या मार्गांवर बंदी, शस्त्र प्रदर्शनावर कडक कारवाई: उत्तर प्रदेशचे डीजीपी

Story by आवाज़ मराठी | Published by Fazal Pathan • 4 h ago

प्रातिनिधिक चित्र

उत्तर प्रदेशचे पोलीस महासंचालक (DGP) राजीव कृष्णा यांनी गुरुवारी राज्यातील सर्व पोलीस युनिट्सना मोहर्रमच्या मिरवणुका किंवा धार्मिक कार्यक्रमांसाठी नवीन मार्गांना परवानगी नाकारण्याचे निर्देश दिले. तसेच, मिरवणुकीदरम्यान शस्त्र प्रदर्शनावर कडक बंदी घालण्याची सक्तीने अंमलबजावणी करण्याचे आदेशही त्यांनी दिले.

सोशल मीडिया आणि समाजकंटकांवर नजर

पोलीस महासंचालकांनी २७ जून ते ६ जुलै या कालावधीत साजऱ्या होणाऱ्या मोहर्रमच्या तयारीसाठी समाजकंटक आणि जातीयवादी घटकांवर प्रतिबंधात्मक कारवाई करण्याचे आदेश दिले. तसेच, सोशल मीडियाचे चोवीस तास बारकाईने निरीक्षण करण्याचे निर्देशही त्यांनी दिले आहेत. एका अधिकृत निवेदनानुसार, डीजीपी कृष्णा यांनी कायदा आणि सुव्यवस्था तसेच जातीय सलोखा राखण्यासाठी सर्व झोनल अतिरिक्त पोलीस महासंचालक, पोलीस आयुक्त, रेंज इन्स्पेक्टर जनरल, उपमहानिरीक्षक आणि जिल्हा वरिष्ठ पोलीस अधीक्षक तसेच पोलीस अधीक्षकांना एक सर्वसमावेशक रणनीती दिली आहे.

नवीन परंपरा आणि मार्गांना परवानगी नाही

"सर्व पोलीस ठाण्यांना उत्सव नोंदींचे पुनरावलोकन करण्याचे निर्देश दिले आहेत. कोणत्याही परिस्थितीत नवीन परंपरा किंवा मार्गांना परवानगी दिली जाणार नाही याची खात्री करावी," असे निवेदनात म्हटले आहे. "ज्या ठिकाणी यापूर्वी वाद झाले आहेत, तिथे पोलीस आणि महसूल अधिकाऱ्यांनी संयुक्तपणे परिस्थितीचे मूल्यांकन करावे. तसेच, तणाव कमी करण्यासाठी त्वरित कारवाई करावी," असेही त्यात नमूद केले आहे.

संवेदनशील ठिकाणी अधिकाऱ्यांचे दौरे

स्थानिक अधिकाऱ्यांना संवेदनशील ठिकाणी वैयक्तिक भेट देण्यास सांगितले आहे. समस्यांचे निराकरण करण्याची सूचना केली आहे. बीट अधिकाऱ्यांनी संभाव्य तणावाची ठिकाणे ओळखणे आवश्यक आहे. ही माहिती वरिष्ठ अधिकाऱ्यांपर्यंत पोहोचवावी. वरिष्ठ अधिकाऱ्यांनी त्वरित घटनास्थळी प्रतिसाद द्यावा.

आयोजकांशी समन्वय

डीजीपींनी जोर दिला की, मिरवणुका आणि मजलिसचे आयोजन करणाऱ्या अंजुमन आणि समित्यांची नोंदणी असावी. सुरळीत समन्वयासाठी त्यांच्याशी आगाऊ सल्लामसलत करावी.

पुरेसा पोलीस बंदोबस्त

"सर्व मिरवणूक मार्गांवर पुरेसा पोलीस बंदोबस्त ठेवण्याचे आदेश दिले आहेत. गजेटेड अधिकाऱ्यांच्या देखरेखीखाली 'बॉक्स पॅटर्न'मध्ये दले तैनात असतील," असे कृष्णा म्हणाले. मोहर्रमच्या समारंभात, विशेषतः पहाटेच्या वेळी, महिलांचा वाढता सहभाग लक्षात घेऊन, पोलिसांनी गर्दीची ठिकाणे ओळखावीत. त्यांच्या सुरक्षेसाठी विशेष बंदोबस्त सुनिश्चित करण्याचे आदेश दिले आहेत.

सुरक्षा आणि पारदर्शकता

पोलीस दले नियमित सकाळी गस्त घालतील. सार्वजनिक ठिकाणी आक्षेपार्ह पोस्टर किंवा सामग्री नसल्याची खात्री करतील. सर्व मोठ्या कार्यक्रमांसाठी सीसीटीव्ही आणि ड्रोन पाळत ठेवण्याचे आदेश दिले आहेत. पारदर्शकता आणि जबाबदारी राखण्यासाठी कार्यक्रमांचे व्हिडिओ रेकॉर्डिंग करण्याचे निर्देश डीजीपींनी दिले. "बस स्थानके, रेल्वे स्थानके, बाजारपेठा आणि धार्मिक स्थळे यांसारख्या सार्वजनिक ठिकाणी सुरक्षा तपासणी तीव्र केली जाईल. बॉम्ब शोधक पथके, दहशतवादविरोधी युनिट्स आणि स्निफर डॉग्स आवश्यकतेनुसार तैनात केले जातील," असे त्यांनी निर्देशित केले.

वाहतूक नियम आणि शस्त्रांवर बंदी

त्यांनी असेही नमूद केले की, कोणत्याही परिस्थितीत वाहतुकीत व्यत्यय येऊ नये. संशयास्पद वाहनांची पोलीस अडथळ्यांवर तपासणी करावी. "अधिकाऱ्यांनी मोटार वाहन कायद्याची कठोर अंमलबजावणी करावी," असे त्यांनी सांगितले. धार्मिक मिरवणुकीदरम्यान कोणत्याही प्रकारच्या शस्त्रांच्या सार्वजनिक प्रदर्शनावर स्पष्ट बंदी घालण्यात आली आहे. अवैध शस्त्रे बाळगणाऱ्यांवर तात्काळ कायदेशीर कारवाई करण्याचे निर्देश पोलिसांना दिले आहेत.

दंगल नियंत्रण उपकरणे आणि गुप्तचर यंत्रणा

सर्व आयुक्त कार्यालय आणि जिल्हा कार्यालयांमध्ये गर्दी नियंत्रणासाठी आवश्यक उपकरणे तयार ठेवावीत. हेल्मेट, बॉडी प्रोटेक्टर आणि इतर दंगल नियंत्रण उपकरणे घेऊन राखीव पोलीस कर्मचारी नियुक्त ठिकाणी तैनात असावेत. स्थानिक गुप्तचर युनिट्सना सतर्क राहण्यास सांगितले आहे. तसेच, अवांछित घटकांच्या हालचालींवर बारकाईने नजर ठेवण्यास सांगितले आहे. गुप्तचर स्त्रोतांकडून मिळालेल्या माहितीवर प्रतिबंधात्मक उपायांसह त्वरित कारवाई केली पाहिजे.

सोशल मीडिया निरीक्षण आणि समन्वय

"पोलीस नियंत्रण कक्ष आणि उप-नियंत्रण कक्ष कार्यक्षमतेने काम करतील. जलद माहितीची देवाणघेवाण आणि कारवाईसाठी मजबूत यंत्रणा असेल. फेसबुक, इंस्टाग्राम, 'एक्स' आणि व्हॉट्सॲप यांसारख्या सोशल मीडिया प्लॅटफॉर्मवर बारकाईने नजर ठेवली जाईल. कोणतीही दिशाभूल करणारी किंवा चिथावणीखोर पोस्ट तात्काळ काढून टाकली जाईल. त्यानंतर ती पोस्ट करणाऱ्यांवर कायदेशीर कारवाई केली जाईल," असे डीजीपी कृष्णा म्हणाले. त्यांनी जोर दिला की, उत्तर प्रदेशात मोहर्रम शांततापूर्ण मार्गाने साजरा करण्यासाठी सर्व व्यवस्था वेळेवर, समन्वित आणि उच्च स्तरावर देखरेखीत असाव्यात.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter