अल्पसंख्याक समाजातील मुलींसाठी होणार अभियांत्रिकी महाविद्यालय

Story by Fazal Pathan | Published by Fazal Pathan • 1 d ago

अल्पसंख्याक मुलींसाठी अभियांत्रिकी महाविद्यालयाच्या उभारणीसाठी आयोजित बैठक.

अल्पसंख्याक विशेषतः मुस्लिम समाजातील मुलींना उच्च शिक्षणाच्या संधी उपलब्ध व्हाव्यात, यासाठी महाराष्ट्र सरकारने एक महत्त्वाकांक्षी पाऊल उचलले आहे. मुंबईतील अणुशक्तीनगर येथे अल्पसंख्याक मुलींसाठी अभियांत्रिकी महाविद्यालय उभारण्याचा निर्णय घेण्यात आला आहे. केंद्र सरकारच्या प्रधानमंत्री जनविकास कार्यक्रम (PMJVP) अंतर्गत या महाविद्यालयाच्या स्थापनेसाठी प्रस्ताव सादर करण्याचे निर्देश अल्पसंख्याक विकास मंत्री दत्तात्रय भरणे यांनी दिले.

या महाविद्यालयाच्या उभारणीसंदर्भात मंत्रालयात आयोजित बैठकीत हा निर्णय घेण्यात आला होता. या बैठकीला आमदार सना मलिक, माजी मंत्री नवाब मलिक, अल्पसंख्याक विकास विभागाचे सचिव रुचेश जयवंशी, विशेष कार्यकारी अधिकारी डॉ. गोविंद संगवई, सहसचिव संतोष खोरगडे, अवर सचिव मिलिंद शेनॉय आणि कार्यकारी अभियंता संतोष कुलकर्णी यांच्यासह वरिष्ठ अधिकारी उपस्थित होते.

मंत्री भरणे यांनी सांगितले की, “अल्पसंख्यांक वर्गातील विशेषत: मुस्लीम समाजात शिक्षणाचे प्रमाण वाढण्यासाठी शासन प्रयत्नशील आहे. शैक्षणिक प्रगतीनेच समाजाची प्रगती साधता येत असल्याने त्यांना उच्च शिक्षणाची संधी उपलब्ध करून देणे गरजेचे आहे. विशेषत: मुलींना उच्च शिक्षण मिळावे यासाठी अणुशक्ती नगर येथे अभियांत्रिकी महाविद्यालय उभारण्यात येणार आहे. या अभियांत्रिकी महाविद्यालयामुळे मुलींना तांत्रिक शिक्षणाची संधी मिळेल आणि त्यांचे भविष्य उज्ज्वल होईल.”

त्यांनी या महाविद्यालयात केवळ अल्पसंख्याकच नव्हे, तर इतर समाजातील मुलींनाही प्रवेशाची संधी देण्यावर भर दिला. यासाठी आधुनिक साधनसामग्री, सुसज्ज प्रयोगशाळा आणि आवश्यक सोयी-सुविधा यांचा समावेश असलेला सकारात्मक प्रस्ताव सादर करण्याचे निर्देश दिले.

प्रधानमंत्री जनविकास कार्यक्रम

प्रधानमंत्री जनविकास कार्यक्रम (PMJVP) ही केंद्र सरकारची एक महत्त्वाची योजना आहे. ही योजना अल्पसंख्याक समुदायांच्या शैक्षणिक, सामाजिक आणि आर्थिक उन्नतीसाठी राबवली जाते. या योजनेअंतर्गत शिक्षण, आरोग्य, कौशल्य विकास आणि पायाभूत सुविधांच्या विकासासाठी निधी उपलब्ध करून दिला जातो. अणुशक्तीनगरातील प्रस्तावित अभियांत्रिकी महाविद्यालय हा या योजनेचा एक भाग आहे. यामुळे अल्पसंख्याक मुलींना तांत्रिक शिक्षणात करिअर करण्याची संधी मिळेल.

PMJVP अंतर्गत अल्पसंख्याक समुदायांसाठी अनेक शैक्षणिक उपक्रम राबवले जातात. परदेशात उच्च शिक्षणासाठी शिष्यवृत्ती, व्यावसायिक प्रशिक्षण आणि शैक्षणिक संस्थांच्या उभारणीसाठी निधी दिला जातो. या योजनेने २०२४-२५ मध्ये अल्पसंख्याक विद्यार्थ्यांना परदेशी शिक्षणासाठी शिष्यवृत्ती प्रदान केली आहे.

या भागाच्या आमदर सना मलिक यांनी सांगितले की, “हे महाविद्यालय मुलींच्या सक्षमीकरणासाठी मैलाचा दगड ठरेल. विशेषतः मुस्लिम मुलींना शिक्षणातून आत्मनिर्भर होण्याची संधी मिळेल.”

माजी आमदार नवाब मलिक म्हणाले, “अल्पसंख्याक समुदायाच्या प्रगतीसाठी शिक्षण हेच सर्वात मोठे हत्यार आहे.”

याविषयी स्थानिक कार्यकर्ते शाहिद शेख म्हणाले, “चेंबूरमधील अणुशक्तीनगर हे भाभा अणुसंशोधन केंद्र (BARC) आणि इतर वैज्ञानिक संस्थांसाठी प्रसिद्ध आहे. या क्षेत्रात अभियांत्रिकी महाविद्यालयाची स्थापना ही केवळ शैक्षणिकच नव्हे, तर सामाजिक समावेशकतेच्या दृष्टिकोनातूनही महत्त्वाची आहे. अणुशक्तीनगरात राहणाऱ्या अल्पसंख्याक समुदायातील अनेक कुटुंबांना उच्च शिक्षणाची गरज आहे, परंतु आर्थिक आणि सामाजिक अडथळ्यांमुळे त्यांना संधी मिळत नाहीत. हे महाविद्यालय अभियांत्रिकी आणि तंत्रज्ञान क्षेत्रात करिअर करू इच्छिणाऱ्या मुलींसाठी एक नवे दालन उघडेल.”

महाराष्ट्र सरकारने अल्पसंख्याक समुदायाच्या विकासासाठी अनेक योजना राबवल्या आहेत. उदाहरणार्थ, महाज्योती (महात्मा ज्योतीबा फुले संशोधन व प्रशिक्षण संस्था) ही स्वायत्त संस्था इतर मागासवर्ग, विमुक्त जाती आणि अल्पसंख्याक समुदायांसाठी शैक्षणिक आणि व्यावसायिक विकासासाठी काम करते. या योजनेद्वारे शिष्यवृत्ती आणि प्रशिक्षण कार्यक्रम राबवले जातात. अणुशक्तीनगरातील अभियांत्रिकी महाविद्यालयाचा प्रस्तावही या दृष्टिकोनाशी सुसंगत आहे.

याशिवाय, सरकारने PMJVP अंतर्गत इतर प्रकल्पांवरही काम सुरू केले आहे. यामध्ये शाळा, रुग्णालये आणि कौशल्य विकास केंद्रांचा समावेश आहे. अणुशक्तीनगरातील हे महाविद्यालय अल्पसंख्याक मुलींसाठी तांत्रिक शिक्षणाचा एक नवा पर्याय उपलब्ध करेल आणि त्यांना STEM (Science, Technology, Engineering, and Mathematics) क्षेत्रात करिअर करण्याची संधी देईल.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter