मनामा

परराष्ट्र मंत्री एस. जयशंकर यांनी बहरीन दौऱ्यात बहरीनचे राजे हमद बिन इसा अल खलिफा यांची भेट घेतली. आपल्या चार आखाती देशांच्या दौऱ्याच्या दुसऱ्या टप्प्यात जयशंकर बहरीनमध्ये पोहोचले आहेत. या भेटीदरम्यान दोन्ही नेत्यांनी भारत आणि बहरीन यांच्यातील द्विपक्षीय भागीदारी अधिक बळकट करण्याच्या मार्गांवर सविस्तर चर्चा केली.

द्विपक्षीय संबंधांना नवी दिशा

एस. जयशंकर यांनी बहरीनचे राजे आणि क्राउन प्रिन्स तथा पंतप्रधान सलमान बिन हमद अल खलिफा यांना राष्ट्रपती द्रौपदी मुर्मू आणि पंतप्रधान नरेंद्र मोदी यांचे अभिवादन पोहोचवले. बहरीनमध्ये राहणाऱ्या भारतीय समुदायाच्या सुरक्षिततेची आणि कल्याणाची काळजी घेतल्याबद्दल त्यांनी बहरीनच्या नेतृत्वाचे आभार मानले. भारत-बहरीन भागीदारी अधिक विकसित करण्यासाठी राजांच्या मार्गदर्शनाचे त्यांनी विशेष कौतुक केले.

यापूर्वी जयशंकर यांनी बहरीनचे परराष्ट्र मंत्री अब्दुल्लातिफ बिन रशीद अल झयानी यांची भेट घेतली. या बैठकीत द्विपक्षीय सहकार्य वाढवण्यासह प्रादेशिक घडामोडींवर दोन्ही नेत्यांनी विचारविनिमय केला. बहरीन दौऱ्यात जयशंकर यांनी तेथील भारतीय समुदायाशीही संवाद साधला. भारतीय नागरिक बहरीनच्या समाजासाठी मोठे योगदान देत असून, ते भारत आणि बहरीन दरम्यानचे जिवंत पूल असल्याचे त्यांनी म्हटले.

आखाती देशांचा दौरा

जयशंकर यांचा हा आखाती दौरा कतार, बहरीन, कुवेत आणि ओमान या चार देशांचा आहे. पश्चिम आशियातील वेगाने बदलणाऱ्या राजकीय समीकरणांच्या पार्श्वभूमीवर ही भेट अत्यंत महत्त्वाची मानली जात आहे. कतार भेटीत त्यांनी ऊर्जा, व्यापार आणि गुंतवणूक या क्षेत्रांतील सहकार्याचा आढावा घेतला. बहरीननंतर ते उर्वरित देशांच्या नेत्यांशी चर्चा करणार आहेत. या दौऱ्यानंतर जयशंकर १३ जुलै रोजी न्यूयॉर्कला रवाना होणार असून, तिथे ते भारताच्या संयुक्त राष्ट्र सुरक्षा परिषद (UNSC) २०२८-२९ च्या कार्यकाळासाठीच्या अधिकृत मोहिमेचा शुभारंभ करतील.