"भारत लवकरच जगातील तिसरी सर्वात मोठी अर्थव्यवस्था बनेल," असा विश्वास रिझर्व्ह बँक ऑफ इंडियाचे (RBI) गव्हर्नर संजय मल्होत्रा यांनी शनिवारी व्यक्त केला. प्रधानमंत्री जन धन योजनेने देशाच्या विकासाला मोठी चालना दिली आहे, असे श्रेयही त्यांनी या योजनेला दिले.
अमेरिकेने भारतावर कठोर शुल्क लादण्यापूर्वी, चालू आर्थिक वर्षाच्या एप्रिल-जून तिमाहीत भारताचा जीडीपी ७.८ टक्क्यांनी वाढला होता, जो गेल्या पाच तिमाहींमधील सर्वोच्च दर आहे. याच पार्श्वभूमीवर मल्होत्रा यांचे हे विधान आले आहे.
इंदूरच्या रंगवासा गावात आयोजित 'संतृप्ती शिबिर' या सरकारी बँकांच्या आर्थिक समावेशन मोहिमेला संबोधित करताना मल्होत्रा म्हणाले की, केंद्र सरकार आणि आरबीआयने ११ वर्षांपूर्वी बँकांच्या सहकार्याने जन धन योजना सुरू केली होती, ज्यामुळे देशभरात विकासाला गती मिळाली. "आज, भारताची गणना जगातील पाच सर्वात विकसित देशांमध्ये होते आणि लवकरच देश तिसरी सर्वात मोठी अर्थव्यवस्था बनेल," असे ते म्हणाले.
आरबीआय गव्हर्नर यांनी सांगितले की, देशाच्या विकास प्रवासात सर्व घटकांचा सहभाग सुनिश्चित करण्यासाठी या योजनेंतर्गत ५५ कोटी खाती उघडण्यात आली आहेत, ज्यामुळे लोकांना बचत, पेन्शन, विमा आणि पतपुरवठा यांसारख्या सेवा मिळत आहेत. या कार्यक्रमाला स्टेट बँक ऑफ इंडियाचे (SBI) अध्यक्ष सी. एस. शेट्टी हेही उपस्थित होते.
