अमेरिकेचे राष्ट्राध्यक्ष डोनाल्ड ट्रम्प यांच्या भारत-विरोधी भूमिकेत नरमाई आल्याचे दिसत असून, त्यांनी व्यापारी चर्चा सुरूच राहणार असल्याचे जाहीर केले आहे. "मी माझे खूप चांगले मित्र, पंतप्रधान मोदी यांच्याशी बोलण्यास उत्सुक आहे," असे म्हणत त्यांनी दोन्ही देशांमधील तणाव निवळण्याचे संकेत दिले आहेत. यावर पंतप्रधान नरेंद्र मोदी यांनीही सकारात्मक प्रतिसाद दिला आहे.

'ट्रुथ सोशल' या आपल्या सोशल मीडिया प्लॅटफॉर्मवर डोनाल्ड ट्रम्प यांनी लिहिले, "मला हे जाहीर करताना आनंद होत आहे की, भारत आणि अमेरिका आपल्या दोन्ही राष्ट्रांमधील व्यापारी अडथळे दूर करण्यासाठी वाटाघाटी सुरू ठेवत आहेत. मी आगामी आठवड्यात माझे खूप चांगले मित्र, पंतप्रधान मोदी यांच्याशी बोलण्यास उत्सुक आहे." "मला खात्री आहे की, आपल्या दोन्ही महान देशांसाठी यशस्वी निष्कर्षापर्यंत पोहोचण्यात कोणतीही अडचण येणार नाही!" असेही त्यांनी पुढे म्हटले.

राष्ट्राध्यक्ष ट्रम्प यांच्या या भूमिकेनंतर पंतप्रधान नरेंद्र मोदी यांनीही 'X' वरून सकारात्मक प्रतिसाद दिला. ते म्हणाले, "भारत आणि अमेरिका हे जवळचे मित्र आणि नैसर्गिक भागीदार आहेत. मला विश्वास आहे की, आपल्या व्यापारी वाटाघाटी भारत-अमेरिका भागीदारीची अमर्याद क्षमता उघड करण्याचा मार्ग मोकळा करतील."

"आमची पथके ही चर्चा लवकरात लवकर पूर्ण करण्यासाठी काम करत आहेत. मी देखील राष्ट्राध्यक्ष ट्रम्प यांच्याशी बोलण्यास उत्सुक आहे. आपण आपल्या दोन्ही देशांतील लोकांच्या उज्ज्वल आणि अधिक समृद्ध भविष्यासाठी एकत्र काम करू," असे नरेंद्र मोदी यांनी पुढे म्हटले.

India and the US are close friends and natural partners. I am confident that our trade negotiations will pave the way for unlocking the limitless potential of the India-US partnership. Our teams are working to conclude these discussions at the earliest. I am also looking forward… pic.twitter.com/3K9hlJxWcl

— Narendra Modi (@narendramodi) September 10, 2025

दोन्ही नेत्यांमधील हा सकारात्मक संवाद अशा वेळी झाला आहे, जेव्हा अमेरिकेने भारतावर ५०% पर्यंत कठोर व्यापारी शुल्क लादल्याने दोन्ही देशांमध्ये तणाव निर्माण झाला होता. या नव्या घडामोडीमुळे, दोन्ही देश चर्चेतून हा तिढा सोडवण्यासाठी इच्छुक असल्याचे दिसत आहे.