कर्नाटकात धार्मिक तणाव रोखण्यासाठी विशेष कृती दल

Story by आवाज़ मराठी | Published by Fazal Pathan • 19 h ago

गृहमंत्री जी. परमेश्वरा यांच्या हस्ते 'स्पेशल अ‍ॅक्शन फोर्स'चे उद्घाटन

मंगलुरू येथे कर्नाटकाचे गृहमंत्री जी. परमेश्वर यांनी शुक्रवारी विशेष कृती दल (एसएएफ) चे औपचारिक उद्घाटन केले. दक्षिण कन्नड, उडुपी आणि शिवमोगा या सांप्रदायिकदृष्ट्या संवेदनशील जिल्ह्यांतील वाढत्या तणावांना आळा घालण्यासाठी हे दल स्थापन करण्यात आले आहे. सांप्रदायिक भडका आणि द्वेष गुन्ह्यांच्या पार्श्वभूमीवर शांतता आणि सामाजिक सौहार्द राखण्यासाठी हे दल सक्रियपणे काम करेल.

२४८ प्रशिक्षित कर्मचाऱ्यांचे हे दल प्रामुख्याने नक्षलविरोधी दलातून निवडले गेले आहे. यात एक वरिष्ठ उपमहानिरीक्षक (डीआयजीपी), उपअधीक्षक, निरीक्षक आणि कॉन्स्टेबल यांचा समावेश आहे. दक्षिण कन्नड, उडुपी आणि शिवमोगा येथे तीन स्वतंत्र कंपन्या तैनात असतील, तर मंगलुरूत मुख्यालय असेल.

पत्रकारांशी बोलताना परमेश्वर म्हणाले की, भारतात प्रथमच सांप्रदायिक सौहार्दासाठी असे दल कर्नाटकात स्थापन झाले आहे. गेल्या दहा वर्षांत या तीन जिल्ह्यांतील सांप्रदायिक हिंसाचार, हत्या आणि घटनांमुळे सरकारने हे पाऊल उचलले. हे दल गुप्तचर माहिती गोळा करेल, सांप्रदायिक अशांतता पसरवणाऱ्यांवर कारवाई करेल आणि त्यांना कायद्याच्या कक्षेत आणेल. सौहार्द बिघडवणाऱ्यांसाठी हे दल कठोर, तर शांतताप्रिय नागरिकांसाठी मैत्रीपूर्ण असेल.

दक्षिण कन्नडमधील कोल्थमजाल येथे पिकअप चालकाची हत्या आणि २०२२ च्या मोहम्मद फझील हत्या प्रकरणातील मुख्य आरोपी बजरंग दलाशी संबंधित सुहास शेट्टी यांच्या हत्येनंतर मंत्री दिनेश गुंडू राव यांनी सांप्रदायिक कृतींविरुद्ध कारवाईसाठी अशा दलाची घोषणा केली होती.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter