पाकिस्तानने भारताने आखलेली 'लक्ष्मणरेषा' ओलांडली, तेव्हा दहशतवादी तळ आगीच्या भक्ष्यस्थानी पडले, असे संसदीय कामकाज मंत्री किरेन रिजिजू यांनी सोमवारी म्हटले. लोकसभेत 'ऑपरेशन सिंदूर'वर चर्चा सुरू होत असताना त्यांनी 'एक्स'वर एक पोस्ट केली.
रिजिजू म्हणाले, "आजपासून 'ऑपरेशन सिंदूर'वर चर्चा सुरू होत आहे... रावणाने लक्ष्मणरेषा ओलांडली तेव्हा लंका जळाली. जेव्हा पाकिस्तानने भारताने आखलेली लक्ष्मणरेषा ओलांडली, तेव्हा दहशतवादी तळ आगीच्या भक्ष्यस्थानी पडले."
पहलगाम दहशतवादी हल्ल्याला प्रत्युत्तर म्हणून भारताने केलेल्या 'मजबूत, यशस्वी आणि निर्णायक' 'ऑपरेशन सिंदूर'वर संरक्षण मंत्री राजनाथ सिंह हे चर्चेची सुरुवात करणार आहेत.
अमेरिकेचे अध्यक्ष डोनाल्ड ट्रम्प यांनी भारत आणि पाकिस्तानमधील अणुयुद्ध टाळण्यासाठी मध्यस्थी करून 'शस्त्रसंधी' घडवून आणल्याचा दावा केला आहे. या दाव्यावरून विरोधी पक्ष सरकारला घेरण्याची शक्यता आहे.
इस्लामाबादच्या विनंतीवरून दोन्ही देशांच्या लष्करी ऑपरेशन्सच्या महासंचालकांमध्ये (DGMOs) 'थेट संपर्क' झाल्यानंतर पाकिस्तानला लक्ष्य करणारी कारवाई थांबली, असे भारताने यापूर्वीच स्पष्ट केले आहे.
