छत्तीसगडमध्ये नक्षलवाद्यांच्या शरणागतीचे सत्र थांबण्याचे नाव घेत नाहीये. गेल्या आठवड्यात विजापूर जिल्ह्यात १११ नक्षलवाद्यांनी आत्मसमर्पण केल्यानंतर, आज (सोमवार) कांकेर जिल्ह्यात आणखी २१ नक्षलवाद्यांनी शस्त्रे खाली ठेवली आहेत. यामुळे गेल्या दोन आठवड्यांत शरण आलेल्या नक्षलवाद्यांची एकूण संख्या १८२ वर पोहोचली आहे, जे सुरक्षा दलांचे मोठे यश मानले जात आहे.

कांकेरचे पोलीस अधीक्षक आय.के. एलेसेला यांनी सांगितले की, शरण आलेल्या २१ नक्षलवाद्यांनी १८ शस्त्रे जमा केली आहेत, ज्यात दोन AK-47 रायफल्स, एक कार्बाइन आणि इतर बंदुकांचा समावेश आहे. हे सर्वजण नक्षलवाद्यांच्या उत्तर बस्तर विभागातील होते आणि सरकारच्या पुनर्वसन धोरणाने प्रभावित होऊन तसेच माओवादी विचारसरणीच्या 'पोकळपणा'ला कंटाळून त्यांनी मुख्य प्रवाहात सामील होण्याचा निर्णय घेतला.

या महिन्याच्या सुरुवातीलाच, १६ ऑक्टोबर रोजी, कांकेर जिल्ह्यात ५० नक्षलवाद्यांनी (ज्यात ३२ महिला होत्या) आणि विजापूर जिल्ह्यात १७० नक्षलवाद्यांनी आत्मसमर्पण केले होते. त्याआधी महाराष्ट्रातील गडचिरोली येथे ६१ नक्षलवाद्यांनी शस्त्रे टाकली होती. एकापाठोपाठ होत असलेल्या या शरणागतीमुळे, छत्तीसगडमधील नक्षलवादी चळवळ आता पूर्णपणे खिळखिळी झाली असून, संपुष्टात येण्याच्या मार्गावर आहे.