जम्मू-काश्मीरचे मुख्यमंत्री ओमर अब्दुल्ला एका उद्घाटनासाठी लावलेल्या फितीच्या दिशेने चालत येत होते, पण राष्ट्रध्वजाचे रंग असलेल्या त्या फितीकडे लक्ष जाताच ते अचानक थांबले, असे एका व्हिडिओमध्ये दिसत आहे. ते आले, त्यांनी पाहिले आणि त्यांनी नकार दिला.
"ये नही काट सकते हम ," असे सांगत मुख्यमंत्री ओमर अब्दुल्ला यांनी राष्ट्रध्वजाचे रंग असलेल्या उद्घाटनाच्या फितीवर कात्री चालवण्यास स्पष्ट नकार दिला.
मुख्यमंत्री अब्दुल्ला श्रीनगरमधील काश्मीर हाट येथे नो युअर आर्टिझन्स या कार्यक्रमाचे उद्घाटन करत होते. मुख्यमंत्र्यांचा एक व्हिडिओ समोर आला असून त्यात ते फितीकडे चालत येताना आणि त्यावर तिरंग्याचे रंग असल्याचे लक्षात येताच जागीच थांबताना दिसत आहेत.
केशरी, पांढरा आणि हिरव्या या तिरंगा फितीकडे बोट दाखवत त्यांनी उपस्थित अधिकाऱ्यांना सूचना दिली, "इस्को वहां से खोल दीजिये, दोनो साईड से खोल दीजिये ." त्यांच्यासोबत उपमुख्यमंत्री सुरिंदर चौधरी, सल्लागार नासिर अस्लम वानी आणि इतर मान्यवर उपस्थित होते. फितीचा प्रश्न सुटल्यानंतर अब्दुल्ला यांनी शहराच्या मध्यवर्ती भागात असलेल्या काश्मीर हाटमधील पुढील कार्यक्रमात सहभाग घेतला.
त्यांच्या या कृतीचे इंटरनेटवर सर्वत्र कौतुक होत आहे. एक्सवरील एका वापरकर्त्याने म्हटले, "मुख्यमंत्री श्री ओमर अब्दुल्ला यांचे त्यांच्या प्रसंगावधानतेबद्दल आणि ही चूक सुधारण्यासाठी केलेल्या हस्तक्षेपाबद्दल अभिनंदन." दुसऱ्या एका वापरकर्त्याने म्हटले, "मुख्यमंत्री महोदय, मी तुमच्या या कृतीचा आदर आणि सन्मान करतो. एक आदर्श व्यक्तिमत्त्व म्हणून समोर आल्याबद्दल तुमचे आभार. भारत माता की जय!"
आंतरराष्ट्रीय संबंधांची विद्यार्थिनी मोनिका वर्मा हिने म्हटले, "ओमर अब्दुल्ला यांनी तिरंगी फिती न कापण्याचा निर्णय घेतला... त्यांना आमंत्रित करणाऱ्या लोकांनी याबद्दल विचार केला नव्हता का?" इंटरनॅशनल सेंटर फॉर पीस स्टडीजचे संचालक आणि व्हिजिटिंग फेलो शेख खालिद जहांगीर यांनी ही कृती सन्मान आणि संवेदनशीलता दर्शवणारी असल्याचे म्हटले. काँग्रेसचे मीर इल्यास यांनीही अब्दुल्ला यांच्या प्रसंगावधानतेचे कौतुक केले आहे.
.jpeg)
