पाकव्याप्त जम्मू आणि काश्मीरमध्ये (PoJK) सुरक्षा दलांसोबत झालेल्या चकमकीत तीन जण ठार झाल्यानंतर, 'युनायटेड काश्मीर पीपल्स नॅशनल पार्टी'चे (UKPNP) अध्यक्ष शौकत अली काश्मिरी यांनी सांगितले की, लोकांच्या मूलभूत हक्कांसाठी गेल्या दोन वर्षांपासून एक आंदोलन सुरू आहे.
त्यांनी नमूद केले की, राजकीय पक्षांनी आपापल्या व्यासपीठांवरून लोकांच्या मागण्या उचलून धरल्या आहेत, ज्याचा शेवट 'जॉइंट अवामी ॲक्शन कमिटी'च्या स्थापनेत झाला.
"गेल्या दोन वर्षांपासून 'जॉइंट अवामी ॲक्शन कमिटी'च्या बॅनरखाली एक आंदोलन सुरू आहे आणि ते आंदोलन मूलभूत हक्कांसाठी आहे. गेल्या ७७ वर्षांपासून, लोकांना सर्व प्रकारच्या हक्कांपासून वंचित ठेवण्यात आले आहे," असे शौकत अली काश्मिरी यांनी 'एएनआय'ला सांगितले.
UKPNP च्या अध्यक्षांनी PoJK च्या "कठपुतळी सरकारवर" लोकांच्या "कायदेशीर" आणि "न्याय्य" मागण्या पूर्ण करण्यात अपयशी ठरल्याचा आरोप केला. "वीज टंचाई, बेरोजगारी, उच्चभ्रूंची ऐषारामाची जीवनशैली आणि घटनात्मक अडथळे यांसारख्या समस्या संपवण्याची ते मागणी करत आहेत," असे ते म्हणाले.
त्यांनी आंदोलन तीव्र करण्याचा इशारा दिला आणि सांगितले की, सोशल मीडियामुळे लोक अधिक "जागरूक आणि सजग" झाले आहेत आणि राज्यकर्त्यांची "षडयंत्रे" "अयशस्वी" झाली आहेत. "२९ सप्टेंबर ही अंतिम मुदत होती; जर त्यापूर्वी आमच्या मागण्या मान्य झाल्या नाहीत, तर आम्ही संपूर्ण PoJK मध्ये पूर्ण लॉकडाउन लागू करू आणि पाकिस्तानातून येणारे सर्व प्रवेशमार्ग बंद करू," असे ते म्हणाले.
"PoJK मध्ये लॉकडाउन आहे आणि लाखो मुले, महिला आणि पुरुष रस्त्यावर आहेत. सरकारने लोकांमध्ये फूट पाडण्यासाठी असंख्य डावपेच वापरले, पण ती फूट पडली नाही. सोशल मीडियामुळे, लोक आता जागरूक आणि सजग आहेत आणि लोकांना गोंधळात टाकण्यासाठी राज्यकर्त्यांची सर्व षडयंत्रे आणि रणनीती अयशस्वी ठरल्या आहेत. जोपर्यंत आमचे राजकीय, सामाजिक आणि मूलभूत हक्क पुनर्स- ्थापित होत नाहीत, तोपर्यंत आम्ही हा लॉकडाउन संपवणार नाही," असेही त्यांनी सांगितले.
UKPNP च्या परराष्ट्र व्यवहार समितीचे अध्यक्ष जमील मकसूद यांनी PoJK मधील आंदोलकांवरील हल्ल्याचा निषेध केला आणि सध्याच्या परिस्थितीला "दुर्दैवी" म्हटले. "ही एक अत्यंत दुर्दैवी परिस्थिती आहे, ज्यात पाकिस्तानी 'डीप स्टेट'ने (छुपी सत्ता) आपले हस्तक आणि 'फिफ्थ कॉलम' म्हणून काम करणाऱ्या व्यक्तींना प्रोत्साहन दिले आहे. त्यांनी मुझफ्फराबाद आणि इतर भागांतील शांततापूर्ण आंदोलकांवर आधुनिक आणि अत्याधुनिक शस्त्रांनी गोळीबार केला आहे. या गोळीबारात तीन तरुण मारले गेले आहेत आणि अनेक जण जखमी झाले आहेत," असे ते म्हणाले.
त्यांनी अधिकाऱ्यांवर "दडपशाहीच्या धोरणा"चा अवलंब केल्याचा आरोप केला, ज्याचा उद्देश आपल्या मूलभूत हक्कांची मागणी करणाऱ्या "शांततापूर्ण" आंदोलकांना दाबणे हा आहे.
दरम्यान, पाकव्याप्त जम्मू आणि काश्मीरमध्ये (PoJK) सलग दुसऱ्या दिवशीही मोठे आंदोलन आणि पूर्ण बंदमुळे तणावाची स्थिती कायम आहे. मुझफ्फराबादकडे मोर्चा काढण्याचा प्रयत्न करणाऱ्या आंदोलकांना मोठ्या निर्बंधांना सामोरे जावे लागले. प्रशासनाने सर्व प्रमुख रस्ते बंद केले आणि दळणवळण यंत्रणाही बंद केली. दुद्याल, मीरपूर येथे, ॲक्शन कमिटीने जाहीर केले की, जोपर्यंत प्रशासन त्यांच्या मागण्या मान्य करत नाही, तोपर्यंत एका आंदोलकाचा मृतदेह दफन केला जाणार नाही.
मीरपूर, कोटली आणि मुझफ्फराबादसह संपूर्ण प्रदेशात, 'जॉइंट अवामी ॲक्शन कमिटी'ने (JAAC) मोठ्या रॅली आणि निदर्शनांसाठी रहिवाशांना एकत्र आणले आहे. हे हक्कांसाठीच्या लढ्यात अभूतपूर्व एकता दर्शवते.
मुझफ्फराबादमध्ये तणाव आणखी वाढला, जेव्हा पोलिसांनी एका रॅलीवर गोळीबार केल्याचे वृत्त आले. यात तीन आंदोलक ठार झाले आणि २२ हून अधिक जण जखमी झाले. या घटनेने आंदोलनाला आणखी बळ दिले आहे.
'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -
Awaz Marathi WhatsApp Group
Awaz Marathi Facebook Page
