पंजाबमध्ये सार्वजनिक पायाभूत सुविधांना (Public Infrastructure) लक्ष्य करण्याचा एक मोठा दहशतवादी कट उधळला गेला आहे. पंजाब पोलिसांच्या स्टेट स्पेशल ऑपरेशन्स सेलने (SSOC) सासनगर (मोहाली) येथून परदेशात बसलेल्या एका दहशतवाद्याच्या दोन साथीदारांना अटक केली आहे. या कारवाईदरम्यान आरोपींकडून एक जिवंत आयईडी (Improvised Explosive Device) जप्त करण्यात आला आहे. यामुळे मोहाली आणि आसपासच्या परिसरात होणारा मोठा घातपाताचा डाव निकामी करण्यात पोलिसांना यश आले आहे.
पंजाबचे पोलीस महासंचालक (DGP) गौरव यादव यांनी गुरुवारी या महत्त्वपूर्ण कारवाईची माहिती दिली. त्यांनी सोशल मीडिया प्लॅटफॉर्म 'X' वर पोस्ट करत सांगितले की, "सीमापार चालणाऱ्या दहशतवादी नेटवर्कविरुद्धच्या मोहिमेत स्टेट स्पेशल ऑपरेशन्स सेलला मोठे यश मिळाले आहे. मोहालीतून दोन संशयित अतिरेक्यांना ताब्यात घेण्यात आले आहे. त्यांच्याकडून आयईडी जप्त करण्यात आल्याने सार्वजनिक ठिकाणी होणारा मोठा स्फोट टळला आहे."
सार्वजनिक सुरक्षा आणि कडक बंदोबस्त
पोलीस महासंचालकांच्या माहितीनुसार, या दोन दहशतवाद्यांच्या अटकेमुळे सार्वजनिक सुरक्षा आणि कायदा सुव्यवस्थेवर येणारे मोठे संकट टळले आहे. पंजाब पोलिसांच्या सतर्कतेमुळे एका संभाव्य भीषण दुर्घटनेपासून मोहाली शहराला वाचवण्यात आले आहे. अटक करण्यात आलेले दोन्ही आरोपी परदेशात लपून बसलेल्या एका मुख्य सूत्रधाराच्या (Handler) संपर्कात होते आणि त्याच्याच सांगण्यावरून मोहालीतील महत्त्वाच्या सरकारी किंवा सार्वजनिक ठिकाणांना लक्ष्य करण्याची त्यांची योजना होती.
या कारवाईनंतर पंजाब पोलिसांनी संपूर्ण परिसरात सुरक्षा व्यवस्था अधिक कडक केली आहे. या आंतरराष्ट्रीय दहशतवादी नेटवर्कची पाळेमुळे किती खोलवर पसरलेली आहेत, याचा शोध घेण्यासाठी पोलिसांचा तपास सुरू आहे. या कटात सामील असलेले इतर हँडलर्स, त्यांचे स्थानिक साथीदार आणि या संपूर्ण कारस्थानामागे असलेल्या आर्थिक आणि तांत्रिक लिंकचा शोध घेण्यासाठी पोलिसांचे विशेष पथक पुढील तपास करत आहे.
.jpeg)
