नवी दिल्ली

शिक्षण व्यवस्थेत पारदर्शकता आणि सुधारणेची मागणी करत जंतरमंतर येथे आंदोलन करणाऱ्या पर्यावरणवादी सोनम वांगचुक यांना आता बॉलिवूडमधूनही मोठा पाठिंबा मिळत आहे. अभिनेत्री दिया मिर्झा हिने शनिवारी सोशल मीडियाच्या माध्यमातून वांगचुक यांच्या भूमिकेला पाठिंबा दर्शवला असून, शिक्षण व्यवस्थेतील उत्तरदायित्वाच्या मागणीशी आपण सहमत असल्याचे म्हटले आहे.

सोनम वांगचुक यांची प्रकृती खालावल्यामुळे त्यांना शनिवारी सफदरजंग रुग्णालयात हलवण्यात आले होते. तरीही, त्यांनी आपले उपोषण सुरूच ठेवले आहे. या आंदोलनाबद्दल माहिती शेअर करताना दिया मिर्झाने आपल्या पोस्टमध्ये म्हटले आहे की, "मी या देशातील विद्यार्थ्यांच्या बाजूने उभी आहे. शांततापूर्ण आंदोलनाच्या अधिकाराला माझा पाठिंबा आहे. शिक्षण व्यवस्थेत उत्तरदायित्व, पारदर्शकता आणि सुधारणांच्या मागणीचे मी समर्थन करते. मी सोनम वांगचुक, नेहा, अमीन आणि मनिष यांच्यासोबत आहे."

दिया मिर्झाव्यतिरिक्त सोनाक्षी सिन्हा, गायक विशाल ददलानी आणि अभिनेत्री पार्वती थिरुवोथू यांनीही वांगचुक यांच्या आंदोलनाप्रति आपला पाठिंबा व्यक्त केला आहे. तसेच, ऋतिक रोशन, झीनत अमान, अनुराग कश्यप, सोनी राजदान आणि अभय देओल यांसारख्या अनेक दिग्गज कलाकारांनीही या आंदोलनाबाबत आपली सहानुभूती दर्शवली आहे.

कॉकरोच जनता पार्टीच्या (CJP) नेतृत्वाखाली सुरू असलेल्या या आंदोलनात केंद्रीय शिक्षण मंत्री धर्मेंद्र प्रधान यांच्या राजीनाम्याची मागणी करण्यात येत आहे. नीट (NEET) परीक्षेत झालेल्या कथित अनियमिततेच्या विरोधात वांगचुक हे गेल्या काही दिवसांपासून उपोषणाला बसले आहेत. देशातील विद्यार्थ्यांचे भविष्य आणि शिक्षण क्षेत्रातील सुधारणा यांसारख्या संवेदनशील विषयावर बॉलिवूड कलाकारांनी घेतलेल्या या भूमिकेमुळे या आंदोलनाची चर्चा अधिक व्यापक झाली आहे.