पश्चिम बंगालमध्ये ऐतिहासिक विजय मिळवल्यानंतर भाजपचे नियोजित मुख्यमंत्री शुभेंदू अधिकारी यांनी शुक्रवारी संध्याकाळी राज्यपाल आर. एन. रवी यांची भेट घेऊन सत्तास्थापनेचा दावा केला आहे. केंद्रीय गृहमंत्री अमित शाह यांच्या अध्यक्षतेखाली झालेल्या बैठकीत भाजप विधिमंडळ पक्षाच्या नेतेपदी निवड झाल्यानंतर अवघ्या दोन तासांत अधिकारी राजभवनात पोहोचले.

ऐतिहासिक विजयानंतर सत्तास्थापनेची प्रक्रिया

शुभेंदू अधिकारी यांच्यासोबत केंद्रीय मंत्री भूपेंद्र यादव, सुकांत मजुमदार, शंतनू ठाकूर आणि ओदिशाचे मुख्यमंत्री मोहन चरण माझी यांच्यासह भाजपचे अनेक वरिष्ठ नेते उपस्थित होते. नुकत्याच पार पडलेल्या २९४ सदस्यीय विधानसभा निवडणुकीत भाजपने २०७ जागा जिंकून दणदणीत बहुमत मिळवले आहे, तर तृणमूल काँग्रेसला केवळ ८० जागांवर समाधान मानावे लागले आहे.

अधिकारी आणि त्यांच्या मंत्रिमंडळाचा शपथविधी सोहळा शनिवारी ब्रिगेड परेड ग्राऊंडवर मोठ्या थाटामाटात पार पडणार आहे. या सोहळ्याला पंतप्रधान नरेंद्र मोदी, वरिष्ठ केंद्रीय मंत्री आणि भाजपशासित राज्यांचे सुमारे २० मुख्यमंत्री उपस्थित राहण्याची शक्यता आहे.

ग्रामीण भागातील नेत्याकडे नेतृत्व

शुभेंदू अधिकारी हे बंगालचे ९ वे मुख्यमंत्री म्हणून शपथ घेतील. विशेष म्हणजे, ५५ वर्षांनंतर राज्याच्या प्रशासनाची धुरा ग्रामीण भागातून आलेल्या नेत्याकडे जाणार आहे. यापूर्वी १९७१ मध्ये अजय मुखर्जी यांनी मुख्यमंत्री म्हणून पदभार स्वीकारला होता, जे अविभाजित मेदिनीपूरचे होते. योगायोगाने शुभेंदू अधिकारी हे देखील त्याच मेदिनीपूर भागातील आहेत. कोलकात्याबाहेरून येऊन मुख्यमंत्रिपद भूषवणारे ते मुखर्जींनंतरचे पहिलेच नेते ठरणार आहेत.