ग्वाल्हेर

ग्वाल्हेरमध्ये एका ७० वर्षीय चार्टर्ड अकाउंटंटची (CA) सायबर गुन्हेगारांनी २१ कोटी रुपयांची फसवणूक केल्याचा धक्कादायक प्रकार समोर आला आहे. 'हाय रिटर्न'चे (उच्च परतावा) आमिष दाखवून गेल्या सहा महिन्यांत या फसवणुकीचे जाळे रचण्यात आले होते. या प्रकरणी ग्वाल्हेर पोलिसांनी गुन्हा दाखल केला असून, आतापर्यंत १.७५ कोटी रुपये गोठवण्यात (Freeze) यश आले आहे.

काय आहे प्रकरण?

ग्वाल्हेरच्या इंद्रगंज परिसरातील रहिवासी असलेल्या या ज्येष्ठ चार्टर्ड अकाउंटंटला डिसेंबर २०२५ च्या शेवटच्या आठवड्यात एका महिलेचा व्हॉट्सॲपवर मेसेज आला होता. तिने स्वतःची ओळख 'गुंतवणूक सल्लागार' (Investment Adviser) अशी करून दिली. सुरुवातीला लहान गुंतवणुकीवर चांगला परतावा दाखवून तिने या वृद्धाचा विश्वास संपादन केला. त्यानंतर, फसवणूक करणाऱ्यांनी एक बनावट ऑनलाइन गुंतवणूक पोर्टल तयार केले, ज्यावर काल्पनिक नफा (Fictitious Profits) दिसू लागला.

१०० हून अधिक व्यवहारांतून फसवणूक

पोर्टलवरील नफा खरा मानून, संबंधित चार्टर्ड अकाउंटंटने सहा महिन्यांच्या कालावधीत २१ कोटी रुपयांहून अधिक रक्कम गुंतवली. जेव्हा त्यांनी आपले पैसे काढण्याचा प्रयत्न केला, तेव्हा आरोपींनी टाळाटाळ करण्यास सुरुवात केली. त्यानंतर, पैसे परत करण्यासाठी आणखी काही कोटी रुपयांची मागणी केली गेली, तेव्हा आपली फसवणूक झाल्याचे त्यांच्या लक्षात आले.

तक्रारीनुसार, पीडिताच्या चार बँक खात्यांतून १०० हून अधिक व्यवहार (Transactions) करण्यात आले होते. सायबर क्राईम ब्रँचचे उपअधीक्षक संजीव नयन शर्मा यांनी सांगितले की, पोलीस आता या खात्यांचा माग काढत आहेत ज्यामध्ये ही रक्कम वळवण्यात आली होती. प्रकरणाचा पुढील तपास सुरू आहे.