शुभमन गिल आणि साई सुदर्शन यांच्या दमदार फलंदाजीनंतर गोलंदाजांनी केलेल्या भेदक माऱ्याच्या जोरावर गुजरात टायटन्सने चेन्नई सुपर किंग्सचा ८९ धावांनी दणदणीत पराभव केला आहे. या पराभवामुळे चेन्नईचे आयपीएल २०२६ च्या प्लेऑफमध्ये पोहोचण्याचे आव्हान संपुष्टात आले असून सलग तिसऱ्या वर्षी पाच वेळच्या विजेत्या संघाला बाद फेरी गाठता आलेली नाही. दुसरीकडे, या विजयामुळे गुजरातचा टॉप २ मधील प्रवेश जवळपास निश्चित झाला आहे.
प्रथम फलंदाजी करताना गुजरात टायटन्सने ४ बाद २२९ धावांचा डोंगर उभा केला. शुभमन गिल (३७ चेंडूंत ६४ धावा) आणि साई सुदर्शन (५३ चेंडूंत ८४ धावा) यांनी सलामीला येत १२५ धावांची विक्रमी भागीदारी केली.
गिल आणि सुदर्शनची विक्रमी भागीदारी
या दोघांनी आयपीएलमध्ये सातव्यांदा शतकी भागीदारी रचून डेव्हिड वॉर्नर आणि शिखर धवन, तसेच ट्रॅव्हिस हेड आणि अभिषेक शर्मा यांचा प्रत्येकी सहा शतकी भागीदारींचा विक्रम मोडला आहे. गिलने आपल्या डावात स्पेंसर जॉन्सन आणि नूर अहमदसारख्या गोलंदाजांचा चांगलाच समाचार घेतला. जॉन्सनच्या एकाच षटकात त्याने अनेक शानदार चौकार वसूल केले. तर सुदर्शनने सलग पाचवे अर्धशतक झळकावले.
या भक्कम सुरुवातीनंतर जोस बटलरने (२७ चेंडूंत नाबाद ५७ धावा) अखेरच्या षटकांमध्ये चौकार आणि षटकारांची आतषबाजी करत संघाला विशाल धावसंख्येपर्यंत पोहोचवले. बटलरने नूर अहमदच्या गोलंदाजीवरही दोन मोठे षटकार मारले.
चेन्नईची निराशाजनक फलंदाजी
२३० धावांच्या मोठ्या लक्ष्याचा पाठलाग करताना चेन्नई सुपर किंग्सची सुरुवात अत्यंत खराब झाली. पहिल्याच चेंडूवर मोहम्मद सिराजने संजू सॅमसनला बाद करून चेन्नईला पहिला धक्का दिला. त्यानंतर पॉवरप्लेच्या पहिल्या ६ षटकांतच चेन्नईने ५१ धावांवर आपले ४ महत्त्वाचे फलंदाज गमावले. कगिसो रबाडाने मॅथ्यू शॉर्टला बाद करत चेन्नईच्या अडचणी आणखी वाढवल्या.
अष्टपैलू शिवम दुबेने १७ चेंडूंत ४७ धावांची झटपट खेळी करत थोडा प्रतिकार करण्याचा प्रयत्न केला, पण तो पुरेसा ठरला नाही. चेन्नईचा संपूर्ण संघ १३.४ षटकांत अवघ्या १४० धावांवर गारद झाला. या विजयासह गुजरात टायटन्सने १४ सामन्यांतून १८ गुण मिळवत आपले अव्वल स्थान मजबूत केले आहे. दुसरीकडे, रॉयल चॅलेंजर्स बंगळुरूसोबत होणाऱ्या उद्याच्या सामन्यात सनरायझर्स हैदराबादने विजय मिळवल्यास ते देखील १८ गुणांपर्यंत पोहोचू शकतात. ३१ मे रोजी अहमदाबादमध्ये होणाऱ्या अंतिम सामन्यात पोहोचण्यासाठी पहिल्या दोन संघांना दोन संधी मिळतील.
.jpeg)
