मुंबई दौऱ्यात बोहरा मुस्लीम समाजाच्या कार्यक्रमाला उपस्थित राहणार पंतप्रधान?

Story by आवाज़ मराठी | Published by Pooja Nayak • 2 Years ago

प्रातिनिधिक फोटो

पंतप्रधान नरेंद्र मोदी हे पुन्हा एकदा मुंबई दौऱ्यावर येणार असून, ते १० फेब्रुवारीला बोहरा मुस्लिम समाजाच्या कार्यक्रमाला उपस्थित राहण्याची शक्यता आहे. मोदींच्या हस्ते नुकतेच विविध विकासकामांचे लोकार्पण करण्यात आले होते. तसेच बीकेसीतील जाहीरसभेमध्ये त्यांनी महापालिका निवडणुकीचे रणशिंगही फुंकले होते. आता पुन्हा बोहरा मुस्लिम समुदायाच्या मोदी संवादाच्या निमित्ताने भाजपने महापालिकेसाठी चाचपणी सुरू केली आहे.

कोण आहेत बोहरा?

बोहरा हे इस्माइली पंथाच्या एका उपपंथाचे अनुयायी आहेत. पहिल्यांदा धर्मांतरित झालेले बहुसंख्य लोक ब्राह्मण व्यापारी होते, म्हणून या पंथाला ‘बोहरा’ असे नाव देण्यात आले आहे. व्यापार या अर्थाच्या ‘वेह्वार’ या गुजराती शब्दापासून (संस्कृत-व्यवहार) बोहरा हा शब्द बनला आहे. बोहरा समाज हा अजूनही मोठ्या प्रमाणात व्यापारीच आहे आणि त्याने आपले जीवन शांततामय व्यवसायांना वाहिलेले आहे. हा अल्पसंख्य समाज राजकारणापासून अलिप्त असून पोलिसांच्या नोंदींमध्ये तो राजकीय महत्त्वाकांक्षांपासून मुक्त आहे. बहुसंख्य बोहरा हे शियापंथी व व्यापारी असले, तरी काही बोहरा हे सुन्नी असून ते प्रामुख्याने शेती करतात. १५३९ पर्यंत बोहरांचे पंथप्रमुख येमेनमध्येच राहत असत. भारतातील बोहरा त्यांच्याकडे जाऊन आपल्या समस्या त्यांच्याकडून सोडवून घेत. परंतु येमेनपेक्षा भारतातील अनुयायांची संख्या खूपच वाढल्यामुळे १५३९ साली पंथप्रमुख येमेनहून द. गुजरातमधील सिद्धपूर येथे आले.