पाक-अफगाण रेल्वे प्रकल्पाला ‘यामुळे’ मिळाली गती

Story by आवाज़ मराठी | Published by Fazal Pathan • 2 d ago

प्रातिनिधिक चित्र

पाकिस्तान आणि अफगाणिस्तानने रविवारी १ जून २०२५ रोजी उझबेकिस्तान-अफगाणिस्तान-पाकिस्तान (UAP) रेल्वे प्रकल्पाला गती देण्याचा निर्णय घेतला. हा प्रकल्प प्रादेशिक जोडणीसाठी महत्त्वाचा मानला जातो.

पाकिस्तानचे उपपंतप्रधान आणि परराष्ट्रमंत्री इशाक दार आणि अफगाणिस्तानचे कार्यवाहक परराष्ट्रमंत्री अमिर खान मुत्तकी यांच्यात फोनवर झालेल्या चर्चेत हा करार झाला. “UAP रेल्वे प्रकल्प प्रादेशिक जोडणीसाठी महत्त्वाचा आहे. करार लवकर पूर्ण करण्यासाठी एकत्र काम करू,” असं दोन्ही नेत्यांनी सांगितलं, असं परराष्ट्र कार्यालयाने म्हटलं.

३० मे रोजी पाकिस्तानने काबूलशी राजनैतिक संबंध राजदूत स्तरावर नेण्याची घोषणा केली. अफगाणिस्ताननेही तसंच पाऊल उचललं. मुत्तकी यांनी याला द्विपक्षीय संबंधांसाठी सकारात्मक पाऊल म्हटलं.

१९ एप्रिल रोजी दार यांच्या काबूल दौऱ्यातील निर्णयांच्या अंमलबजावणीचा आढावा दोन्ही नेत्यांनी घेतला. दोन्ही देशांनी परस्पर विश्वास वाढवण्यासाठी एकत्र काम करण्याचा संकल्प केला.

पाकिस्तानने काबूलवर तहरीक-ए-तालिबान पाकिस्तान (TTP) दहशतवाद्यांना आश्रय देण्याचा आरोप केल्याने संबंध ताणले गेले होते. पण चीनच्या त्रिपक्षीय मध्यस्थीमुळे संबंध सुधारत असल्याचं निरीक्षकांचं मत आहे.

हा रेल्वे प्रकल्प पाकिस्तानला मध्य आशियाशी जोडेल. शनिवारी दार यांनी उझबेकिस्तानचे परराष्ट्रमंत्री सैदोव बख्तियोर ओदिलोविच यांच्याशीही चर्चा केली. UAP रेल्वे प्रकल्पाच्या कराराच्या अंतिम स्वरूपासाठी आणि स्वाक्षरी समारंभाच्या तपशीलासाठी अफगाणिस्तानच्या नेतृत्वाशी सल्लामसलत करणार असल्याचं परराष्ट्र कार्यालयाने सांगितलं.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter