ISIS-K ने बलोच कार्यकर्त्यांना दिल्या ‘या’ धमक्या

Story by आवाज़ मराठी | Published by Fazal Pathan • 1 d ago

प्रातिनिधिक चित्र

माजी सिनेटर आणि पश्तून राष्ट्रवादी नेते अफ्रासियाब खट्टक यांनी इस्लामिक स्टेट खोरासान प्रोव्हिन्स (ISIS-K) च्या वाढत्या प्रभावाबाबत पाकिस्तान सरकारकडून स्पष्टीकरण मागितलं आहे. बालोच समुदाय आणि स्वातंत्र्यवादी संघटनांविरुद्ध ISIS-K च्या धमक्यांनंतर त्यांनी हा इशारा दिला, असं द बालोचिस्तान पोस्ट (TBP) ने वृत्त दिलं.

खट्टक यांनी X या सामाजिक माध्यम मंचावर पोस्ट करत पाकिस्तानातील ISIS च्या वाढत्या कार्यक्षेत्राबाबत सरकारी संस्थांच्या मौनावर प्रश्न उपस्थित केले. परदेशी दहशतवादी परदेशी गुप्तचर यंत्रणांशी जोडले गेले असल्याच्या चिंताजनक प्रवृत्तीचा उल्लेख करत त्यांनी ISIS-K ने बालोच लिबरेशन आर्मी (BLA) विरुद्ध युद्ध पुकारल्याचं उघड केलं.

खट्टक यांनी ISIS-K च्या उदयाची तुलना दोन दशकांपूर्वीच्या अल-कायदाच्या कारवायांशी केली आणि पाकिस्तानच्या गुप्तचर आणि सुरक्षा यंत्रणांकडून उत्तरदायित्वाची मागणी केली. २५ मे रोजी ISIS-K ने मस्तुंग जिल्ह्यातील आपल्या तळांवर बालोच गटांनी हल्ले केल्याचा आरोप करत एक व्हिडिओ प्रसिद्ध केला. यात त्यांनी केवळ सशस्त्र बालोच गटांनाच नव्हे, तर मानवाधिकार कार्यकर्त्या महरंग बालोच, बेपत्ता व्यक्तींचे कुटुंबीय आणि शांततापूर्ण निदर्शनांमध्ये सहभागी लोकांना धमकावलं, असं TBP ने नमूद केलं.

माजी अमेरिकी राजदूत आणि विशेष दूत झल्माय खलिलझाद यांनीही या घडामोडींबाबत गंभीर चिंता व्यक्त केली. त्यांनी ISIS-K आणि पाकिस्तानी सुरक्षा दलं बालोच राष्ट्रवादी गटांविरुद्ध एकत्र आल्याचं सूचित केलं, ज्याला त्यांनी या क्षेत्रातील शक्ती संतुलनातील धोकादायक बदल असं संबोधलं. खलिलझाद यांनी जागतिक समुदायाला इशारा दिला की, बालोचिस्तानात अतिरेकी गट आणि सरकारी एजंट यांच्यातील वाढता संबंध प्रादेशिक शांतता आणि स्थिरतेसाठी गंभीर धोका निर्माण करू शकतो, असं TBP ने म्हटलं.

ISIS-K ने पश्तो आणि फारसी भाषेत धमक्या जारी केल्या, ज्यात बालोचिस्तानातील समर्थकांना बालोच राजकीय आणि राष्ट्रवादी गटांविरुद्ध आक्रमक कारवाया करण्याचं आवाहन केलं. विशेषतः बालोच यकजेती कमिटी (BYC) च्या निदर्शनांवर हल्ले करण्यास उत्तेजन दिलं, असं TBP ने वृत्त दिलं.

या धमक्यांना बालोच राजकीय गट आणि मानवाधिकार कार्यकर्त्यांनी तीव्र निषेध व्यक्त केला. त्यांनी पाकिस्तान सरकारवर अतिरेकी संघटनांचा वापर वैध राजकीय असंतोष आणि नागरी हक्क चळवळी दडपण्यासाठी करत असल्याचा आरोप केला. TBP नुसार, मानवाधिकार संघटनांनी आंतरराष्ट्रीय संस्थांकडे पाकिस्तानकडून उत्तरदायित्वाची मागणी आणि बालोचिस्तानातील असुरक्षित लोकसंख्येच्या सुरक्षिततेची हमी देण्याची विनंती केली.

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter