अमेरिकेचे राष्ट्राध्यक्ष डोनाल्ड ट्रम्प यांनी भारताचे पंतप्रधान नरेंद्र मोदी हे आपले अत्यंत चांगले मित्र असल्याचे सांगत अमेरिका आणि भारत यांच्यात लवकरच एक मोठा व्यापारी करार होईल, असा दृढ विश्वास व्यक्त केला आहे. व्हाईट हाऊसच्या ओव्हल ऑफिसमध्ये पत्रकारांशी बोलताना ट्रम्प यांनी भारत आणि अमेरिकेतील द्विपक्षीय आर्थिक संबंधांवर भाष्य केले. दोन्ही देशांमध्ये सध्या सुरू असलेल्या व्यापारी चर्चेच्या पार्श्वभूमीवर अमेरिकन राष्ट्राध्यक्षांचे हे वक्तव्य अत्यंत महत्त्वाचे मानले जात आहे.
"आम्ही लवकरच एका व्यापारी करारावर पोहोचू, कारण मला तुमचे पंतप्रधान खूप आवडतात. ते माझे खूप चांगले मित्र आहेत. आमचे आपसात खूप चांगले जमते आणि आम्ही हा करार नक्की पूर्ण करू," असे ट्रम्प यांनी माध्यम प्रतिनिधींना सांगितले. दोन्ही देशांमधील व्यावसायिक हितसंबंध आणि धोरणात्मक भागीदारी वाढवण्यासाठी हा संभाव्य करार महत्त्वपूर्ण ठरेल, असे संकेत त्यांनी दिले.
कर रचनेवर ट्रम्प यांची टिप्पणी
दोन्ही देशांमकरून वाटाघाटी सुरू असलेल्या या व्यापारी कराराबाबत विचारलेल्या प्रश्नाला उत्तर दताना ट्रम्प यांनी भारताच्या जुन्या आयात कर धोरणावर काही प्रमाणात टीका देखील केली. भारताने वर्षानुवर्षे अमेरिकेच्या व्यापारी धोरणांचा फायदा घेतला असून अमेरिकन कंपन्यांवर प्रचंड प्रमाणात आयात शुल्क (Tremendous Tariffs) लादले असल्याचा आरोप त्यांनी केला. "भारतीय यंत्रणेने आमच्या कंपन्यांवर मोठ्या प्रमाणात कर लावले, तर आम्ही त्यांच्याकडून कोणत्याही प्रकारचा अतिरिक्त कर वसूल केला नाही," असे ट्रम्प यांनी नमूद केले. मात्र, या जुन्या मतभेदांनंतरही पंतप्रधान मोदींसोबतच्या वैयक्तिक संबंधांमुळे या कराराचा मार्ग मोकळा होईल, असे त्यांनी स्पष्ट केले.
द्विपक्षीय वाटाघाटींचा सकारात्मक टप्पा
भारत आणि अमेरिका यांच्यातील या अंतरिम द्विपक्षीय करारावर चर्चा करण्यासाठी अमेरिकेचे एक उच्चस्तरीय शिष्टमंडळ या आठवड्यात भारताच्या दौऱ्यावर आले होते. दोन्ही देशांच्या प्रतिनिधींमध्ये सलग चार दिवस चाललेली ही महत्त्वपूर्ण चर्चा गुरुवारी संपली.
भारताच्या वाणिज्य मंत्रालयाने (Commerce Ministry) या संदर्भात माहिती देताना सांगितले की, दोन्ही देशांमधील ही व्यापारी चर्चा अत्यंत सकारात्मक, सहकार्याच्या आणि व्यावहारिक वातावरणात पार पडली. द्विपक्षीय व्यापार अधिक मजबूत करण्यासाठी आणि आर्थिक संबंधांना नवी गती देण्यासाठी दोन्ही देशांनी परस्परांना फायदेशीर ठरेल अशा करारावर लवकरात लवकर पोहोचण्याच्या आपल्या वचनबद्धतेचा पुनरुच्चार केला आहे.
.jpeg)
