नवी दिल्ली

भारताचे परराष्ट्रमंत्री एस. जयशंकर यांनी सोमवारी सांगितले की, भारत पनामासोबत आपले द्विपक्षीय संबंध अधिक दृढ करण्यास उत्सुक आहे. पनामाकडे धोरणात्मक स्थान आणि आर्थिक स्थैर्य असल्यामुळे भारतासाठी हा देश एक महत्त्वाचा भागीदार ठरू शकतो, असे त्यांनी स्पष्ट केले. पनामाचे परराष्ट्र मंत्री जेवियर मार्टिनेझ-आचा वास्केझ सध्या भारत भेटीवर आले असून, हैदराबाद हाऊस येथे दोन्ही नेत्यांमध्ये महत्त्वाची बैठक पार पडली.

वास्केझ हे १९ ते २३ जुलै दरम्यान भारत दौऱ्यावर असून, यादरम्यान ते विविध कार्यक्रमांमध्ये सहभागी होणार आहेत. बैठकीत बोलताना जयशंकर म्हणाले की, दोन्ही देशांमधील उच्चस्तरीय संबंधांमुळे द्विपक्षीय भागीदारीला मोठी गती मिळाली आहे. पनामाच्या परराष्ट्र मंत्र्यांच्या या भेटीमुळे शिक्षण, शिष्यवृत्ती, औषधनिर्माण, तंत्रज्ञान आणि व्यापार यांसारख्या विविध क्षेत्रांत सहकार्य आणखी मजबूत होईल, असा विश्वास त्यांनी व्यक्त केला.

जागतिक व्यापारासाठी महत्त्वाचा मार्ग

पनामा हा जागतिक व्यापार मार्गांसाठी भारतासाठी एक 'नैसर्गिक पूल' म्हणून काम करतो. पनामा कालव्यामुळे येथील लॉजिस्टिक्स इन्फ्रास्ट्रक्चर जागतिक पातळीवर महत्त्वपूर्ण ठरले आहे, असे जयशंकर यांनी नमूद केले. २०४७ पर्यंत 'विकसित भारत' बनण्याच्या लक्ष्याकडे वाटचाल करताना हे द्विपक्षीय संबंध अधिक महत्त्वाचे ठरतील, असे त्यांनी सांगितले.

या बैठकीत संयुक्त राष्ट्र आणि इतर आंतरराष्ट्रीय मंचांवरील सहकार्यावरही चर्चा झाली. तसेच, मागील वर्षी पहलगाम येथील दहशतवादी हल्ल्यानंतर भारताच्या आत्मरक्षणाच्या अधिकाराला पनामाने दिलेला पाठिंबा आणि दहशतवादाचा निषेध केल्याबद्दल जयशंकर यांनी पनामा सरकारचे आभार मानले.