जम्मू 

जम्मू-काश्मीरमधील भारतीय खाद्य निगम (FCI) च्या एका महिला कर्मचाऱ्याचा कथित भारतविरोधी वक्तव्य करणारा व्हिडिओ सोशल मीडियावर मोठ्या प्रमाणावर व्हायरल झाल्यानंतर अन्न निगम प्रशासनाने या प्रकरणाच्या चौकशीचे आदेश दिले आहेत. या महिला अधिकाऱ्याने काश्मीरबाबत आक्षेपार्ह विधाने केल्याचे व्हिडिओमध्ये दिसत असून, प्रशासनाने या प्रकरणाची गंभीर दखल घेतली आहे.

व्हायरल झालेल्या व्हिडिओमध्ये संबंधित महिला काश्मीरबाबत आक्षेपार्ह भाष्य करताना आणि भारतविरोधी वक्तव्य करताना दिसून येत आहे. ही महिला FCI मध्ये मॅनेजर किंवा क्वालिटी कंट्रोल पदावर कार्यरत असल्याची चर्चा आहे. या प्रकरणावर बोलताना FCI चे महाव्यवस्थापक आय. के. चौधरी यांनी स्पष्ट केले की, व्हिडिओमधील महिला खरोखरच निगमची कर्मचारी आहे का आणि तिचा आवाज तिचाच आहे का, याची खात्री करण्यासाठी सखोल चौकशी सुरू करण्यात आली आहे.

कारणे दाखवा नोटीस आणि कठोर कारवाईचा इशारा

चौधरी यांनी प्रसारमाध्यमांशी बोलताना सांगितले की, या प्रकरणी गुरुवारी संबंधित महिला कर्मचाऱ्याला 'कारणे दाखवा' नोटीस बजावली जाईल आणि तिच्या उत्तराच्या आधारे पुढील कठोर कारवाई केली जाईल. चौकशी पूर्ण होण्यापूर्वी अंतिम निष्कर्षावर पोहोचणे घाईचे ठरेल, असेही त्यांनी नमूद केले. केंद्र सरकारच्या कर्मचाऱ्याने अशा प्रकारचे वक्तव्य केल्यामुळे सोशल मीडियावर तीव्र संताप व्यक्त होत असून, सत्यता पडताळल्यानंतर नियमांनुसार कठोर कारवाई केली जाईल, असे प्रशासनाकडून स्पष्ट करण्यात आले आहे.