नवी दिल्ली
पेट्रोलमध्ये इथेनॉलचे प्रमाण २० टक्क्यांपेक्षा अधिक वाढवण्याबाबत केंद्र सरकारने अद्याप कोणताही निर्णय घेतलेला नाही, असे केंद्रीय पेट्रोलियम आणि नैसर्गिक वायू राज्यमंत्री सुरेश गोपी यांनी सोमवारी राज्यसभेत स्पष्ट केले. भविष्यात असा कोणताही निर्णय घ्यायचा झाल्यास वैज्ञानिक व तांत्रिक अभ्यास आणि वाहन उत्पादक कंपन्यांशी सल्लामसलत केल्यानंतरच घेतला जाईल, असे त्यांनी लिखित उत्तरात म्हटले आहे.
भारत सरकारने २० टक्के इथेनॉल मिश्रणाचे उद्दिष्ट वेळेपूर्वीच गाठले असून, यामुळे परकीय चलनात मोठी बचत झाली आहे. २०१३-१४ मधील १.५३ टक्क्यांवरून २०२५-२६ या साठा वर्षात हे प्रमाण २० टक्क्यांपर्यंत पोहोचले आहे. यामुळे कार्बन डायऑक्साइडचे उत्सर्जन कमी होण्यास मदत झाली असून शेतकऱ्यांच्या उत्पन्नातही मोठी वाढ झाली आहे.
जुन्या गाड्यांवर E20 इंधनाचा कोणताही विपरित परिणाम होत नसल्याचे सांगत मंत्र्यांनी मीडियामधील चिंता फेटाळून लावल्या. खाद्य सुरक्षेबाबत बोलताना, इथेनॉलसाठी केवळ अतिरिक्त धान्याचा वापर केला जात असून यामुळे अन्नधान्याच्या उपलब्धतेवर किंवा किमतींवर कोणताही दुष्परिणाम झालेला नाही, असे त्यांनी स्पष्ट केले. डिस्टिलरीज युनिट्सना शून्य-तरल विसर्जनाचे पालन करण्याचे निर्देश देण्यात आले असून जल सुरक्षेची पूर्ण काळजी घेतली जात आहे.
.jpeg)
