बब्बन मियाँ : उत्तर प्रदेशातील मधुसुदन गौशाळेचे सर्वेसर्वा

Story by आवाज़ मराठी | Published by Fazal Pathan • 2 d ago

मधुसुदन गौशालेचे संस्थापक बबन मियाँ

उत्तर प्रदेशातील बुलंदशहर येथील बब्बन मियाँ उर्फ झुबेदुर्रहमान एका गौशाळेचे संस्थापक आहेत. त्यांच्या गौशाळेचे नाव मधुसुदन आहे. त्यांनी त्यांच्या कृतीतून हिंदू-मुस्लिम ऐक्याचा संदेश तर दिलाच तसेच सर्व धर्मात प्राणी मात्रांवर दया करण्याची शिकवण अधोरेखित केली. गौशाळेविषयी ते म्हणतात, “गायींवर प्रेम आणि आदर करण्यासाठी हिंदू असणं आवश्यक नाही. या कार्यात धर्म कधीच अडथळा ठरत नाही. इस्लाम हा मानवतेची शिकवण देणारा धर्म आहे. इस्लामने माणसांप्रमाणेच प्राण्यांवर दया आणि करुनेची शिकवण दिली आहे.” त्यांचा इथंपर्यंतचा प्रेरणादायी प्रवास गंगा-यमुनी संस्कृतीचं जिवंत उदाहरण देणारा आहे.

मधुसुदन गौशालेची सुरुवात

बुलंदशहरच्या चंदियाना गावात असलेली ही गौशाळा बब्बन मियाँ यांच्या आई स्व. हमीदा बेगम यांच्या प्रेरणेने २०१५ मध्ये स्थापन झाली. याविषयी ते म्हणतात, “प्रत्येकाला काही न काही गोष्टी प्रिय असतात. माझ्या आईला गायी खूप प्रिय होत्या. आई गायी पाळायची आणि त्यांची चांगल्या प्रकारे काळजी घ्यायची. गायींची काळजी घेण्यासाठी गौशाळेसारखं काही तरी असावं असं तिला वाटायचं. ती म्हणायची माझी इच्छा आहे, की गायींचं संगोपन करण्याचं कार्य पिढ्यानपिढ्या चालू राहावं. आईचं निधन झालं, तेव्हा तिच्या स्वप्नाला साकार करण्यासाठी मी मधुसुदन गौशाळा सुरू केली.”

बब्बन यांच्या कुटुंबात गेल्या पन्नास वर्षांपासून गायी पाळण्याची परंपरा आहे. गौशाळेची स्थापनेच्या सुरुवातीला बब्बन यांच्याकडे २०-२५ गायी होत्या. आता या गौशाळेत ९० गायी आणि १६ वासरं आहेत.

बारह बस्ती म्हणून ओळखल्या जाणाऱ्या 12 पठाण वसाहतींपैकी एक गाव म्हणजे बुलंदशहरच्या सियाना तहसीलमधील चंदियाना. १६ व्या शतकात शेरशहा सूर यांच्या काळात इस्सा खान नियाझी यांच्यासोबत काही पठाण कुटुंब येथे स्थायिक झाले होते. या गावाची ऐतिहासिक पार्श्वभूमी आणि बब्बन मियाँ यांची गौशाळा यामुळे चंदियाना आज देशभरात चर्चेत आहे.

गौशाळेच्या नावाबाबत बब्बन मियाँ सांगतात, “मधुसुदन हे भगवान श्रीकृष्णाचं नाव आहे. हे नाव आम्ही भाईचारा, धार्मिक सहिष्णुता आणि गंगा-यमुनी संस्कृतीचं प्रतीक म्हणून निवडलं आहे. हे नाव धार्मिक सलोखा आणि भारताची सर्वसमावेशक प्रतिमा अधोरेखित करतं. गायींसाठी उभारलेलं हे आश्रयस्थान समाजात सकारात्मक संदेश देत असून यामुळे बुलंदशहरात नवी ओळख मिळत आहे.”

बब्बन मियाँ यांचं कुटुंब जमीनदार आहे. त्यांच्याकडे शेती, आंब्याच्या बागा, आणि दिल्लीत रिअल इस्टेट व्यवसाय आहे. पण खरा सन्मान आणि समाधान त्यांना मधुसुदन गौशाळेने दिल्याचे ते सांगतात. “या सेवेमुळे मिळालेला आनंद आणि मान शब्दांत सांगता येत नाही. गायींची सेवा आता आमच्या कुटुंबाची ओळख बनली आहे,” असं ते सांगतात. चंदियाना गावात आधीपासूनच सलोख्याचं वातावरण आहे, आणि या गौशाळेमुळे हिंदू-मुस्लिम ऐक्य अधिक बळकट झालं आहे.

गौशाळेची देशभर ख्याती

मधुसुदन गौशाळा आता केवळ स्थानिक पातळीवर मर्यादित नाही तर तिची ख्याती देशभर पसरली आहे. याठिकाणी राजकारणी, सामाजिक कार्यकर्ते, आणि चित्रपटसृष्टीतील व्यक्ती भेट देतात. रझा मुराद, ‘भाभीजी घर पर हैं’ मालिकेची युनिट, पहलवान सुशीलकुमार, आणि बॉक्सर संग्राम सिंह यांनी गौशाळेला भेट दिली आहे.

गंगा-जमुना संस्कृतीचा अभिमान

“भारताची गंगा-जमुना संस्कृती ही आपल्या सर्वांची खरी संपत्ती आहे. या संस्कृतीचा आम्हाला अभिमान आहे. ही संस्कृती आपल्या देशाच्या सौंदर्याचं दर्शन घडवते. ‘सारे जहां से अच्छा हिंदुस्तान हमारा’ असं म्हणण्याचं बळ आम्हाला याच संस्कृतीतून मिळतं,” असं बब्बन मियाँ सांगतात.

पुढे ते म्हणतात, “आम्ही कधीही गौशाळेसाठी कधीही NGOचा बॅनर वापरला नाही किंवा सरकारी मदतीची अपेक्षा ठेवली नाही. या सेवेमुळे अल्लाहने आम्हाला खूप दिलं आहे. आम्हाला आता कोणाकडून काही नको. ही सेवा आहे, यासाठी पैशांची गरज नाही. आमच्या संस्कृतीला जिवंत ठेवणं पैशांपेक्षा जास्त महत्त्वाचं आहे.”

- मंसूरूद्दीन फरीदी

'आवाज मराठी'वर प्रसिद्ध होणारे लेखन, व्हिडिओज आणि उपक्रम यांविषयीचे अपडेट्स मिळवण्यासाठी या लिंक्सवर क्लिक करा -

Awaz Marathi WhatsApp Group
Awaz Marathi Facebook Page

Awaz Marathi Twitter