भारतातील विविध चित्रपट उद्योगांचे प्रतिनिधित्व करणाऱ्या 'इंडियन मोशन पिक्चर प्रोड्युसर्स असोसिएशन'ने (इम्पा) पंतप्रधान नरेंद्र मोदी यांना पत्र लिहिले आहे. 'धुरंधर' चित्रपटावर आखाती देशांत घालण्यात आलेल्या बंदीमध्ये सरकारने हस्तक्षेप करावा, अशी विनंती त्यांनी केली आहे. आदित्य धर यांचे दिग्दर्शन असलेला हा चित्रपट अनेक आखाती देशांमध्ये प्रदर्शित होऊ शकला नाही. यामध्ये यूएई, बहरीन, कुवेत, कतार, ओमान आणि सौदी अरेबियाचा समावेश आहे.
इम्पाचे पंतप्रधानांना पत्र
'इम्पा'ने आपल्या पत्रात या बंदी एकतर्फी आणि अनावश्यक असल्याचे नमूद केले आहे. या निर्णयामुळे 'धुरंधर'च्या निर्मात्यांच्या अभिव्यक्ती स्वातंत्र्यावर गदा आली आहे, असेही त्यांनी म्हटले आहे.
पत्रात म्हटले आहे, "यूएई, बहरीन, कुवेत, कतार, ओमान आणि सौदी अरेबिया या देशांनी 'धुरंधर' चित्रपटावर लादलेली एकतर्फी आणि अनावश्यक बंदी हटवण्यासाठी आपण हस्तक्षेप करावा, अशी आम्ही कळकळीची विनंती करतो. आमच्या सदस्य निर्मात्याने हा चित्रपट तयार केला असून 'सेंट्रल बोर्ड ऑफ फिल्म सर्टिफिकेशन'कडून प्रमाणपत्र मिळाल्यानंतर तो प्रदर्शित केला आहे. वरील देशांनी लादलेली बंदी ही आमच्या सदस्याच्या अभिव्यक्ती स्वातंत्र्याची गळचेपी आहे. भारतीय चित्रपटसृष्टीतील सर्वात मोठ्या हिट चित्रपटांमध्ये या चित्रपटाचा समावेश होतो."
डिसेंबरमध्ये प्रदर्शित होण्यापूर्वी 'धुरंधर'ला 'सेंट्रल बोर्ड ऑफ फिल्म सर्टिफिकेशन'ने (सीबीएफसी) 'ए' प्रमाणपत्र दिले होते. त्यानंतर हा चित्रपट भारतीय चित्रपटसृष्टीच्या इतिहासातील सर्वात मोठ्या हिट चित्रपटांपैकी एक ठरला आहे. हा भारतातील सर्वाधिक कमाई करणारा हिंदी चित्रपट बनला आहे.
'इम्पा'ने पंतप्रधान मोदी आणि केंद्र सरकारला या प्रकरणात हस्तक्षेप करून बंदी उठवण्यासाठी मदत करण्याचे आवाहन केले आहे. 'इम्पा'चे अध्यक्ष अभय सिन्हा यांच्या स्वाक्षरीने लिहिलेल्या पत्रात म्हटले आहे, "सर्वात मोठी आणि जुनी निर्मात्यांची संघटना म्हणून आम्ही आपणास हात जोडून विनंती करतो. यूएई, बहरीन, कुवेत, कतार, ओमान आणि सौदी अरेबिया हे भारताचे मित्र देश आहेत. आम्ही त्यांच्याशी अनेक क्षेत्रांत नियमितपणे व्यवसाय करतो. त्यामुळे भारत सरकारने या देशांतील संबंधित अधिकाऱ्यांकडे हा विषय मांडावा, अशी आमची नम्र विनंती आहे. अभिव्यक्ती स्वातंत्र्याचा आदर केला जावा आणि ही बंदी लवकरात लवकर मागे घेतली जावी यासाठी प्रयत्न करावेत."
चित्रपटाविषयी...
धुरंधर हा एक हेरगिरीवर आधारित थरारपट (स्पाय थ्रिलर) आहे. यात अक्षय खन्ना, अर्जुन रामपाल, संजय दत्त आणि आर. माधवन यांच्याही भूमिका आहेत. या चित्रपटाने जगभरात १,२३० कोटी रुपयांची कमाई केली आहे. हा सर्वकाळातील चौथा सर्वाधिक कमाई करणारा भारतीय चित्रपट ठरला आहे. भारतात ८०० कोटी रुपयांची निव्वळ कमाई करणारा 'धुरंधर' हा एकमेव बॉलिवूड चित्रपट आहे. या चित्रपटाने उद्योगासाठी एक नवीन मापदंड प्रस्थापित केला आहे. हा चित्रपट दोन भागांची फ्रँचायझी म्हणून नियोजित असून, याचा दुसरा भाग २०२६ च्या ईद दरम्यान प्रदर्शित होणार आहे.
.jpeg "शरीफा खानम")
