दिग्गज गायिका आणि पद्मविभूषण पुरस्कार विजेत्या आशा भोसले यांचे काल मुंबईत वयाच्या ९२ व्या वर्षी निधन झाले. महाराष्ट्राचे सांस्कृतिक कार्यमंत्री आशिष शेलार यांनी रुग्णालयाबाहेर प्रसारमाध्यमांशी बोलताना याबाबत माहिती दिली होती. त्यांच्या पार्थिवावर आज दुपारी ४:०० वाजता शिवाजी पार्क येथे अंत्यसंस्कार केले जातील. छातीत संसर्ग आणि थकवा जाणवू लागल्यामुळे त्यांना काल संध्याकाळी मुंबईतील एका खासगी रुग्णालयात दाखल करण्यात आले होते, अशी माहिती त्यांची नात झनाई भोसले हिने सोशल मीडियावरून दिली होती.
आशा भोसले यांची गणना आधुनिक भारतीय संगीतातील महान गायिकांमध्ये केली जाते. अनेक दशकांचा त्यांचा हा सांगितीक प्रवास अत्यंत प्रभावी राहिला. १९३३ मध्ये नामवंत मंगेशकर कुटुंबात त्यांचा जन्म झाला. वयाच्या नवव्या वर्षीच त्यांनी आपल्या गायकीच्या प्रवासाला सुरुवात केली होती. १९४३ मध्ये त्यांनी त्यांचे पहिले चित्रपट गीत ध्वनिमुद्रित केले. १९५० च्या दशकापर्यंत त्यांनी हिंदी चित्रपटसृष्टीत स्वतःची एक वेगळी ओळख निर्माण केली होती. अनेक दशके त्या चित्रपटसृष्टीतील सर्वात लोकप्रिय पार्श्वगायिका राहिल्या. सिनेसृष्टीतील अग्रगण्य संगीत दिग्दर्शकांसोबत त्यांनी काम केले.
‘अभी ना जाओ छोडकर’, ‘इन आँखों की मस्ती’, ‘दिल चीज क्या है’, ‘पिया तू अब तो आजा’, ‘दुनिया में लोगों को’ आणि ‘जरा सा झूम लूँ मैं’ ही त्यांची काही गाजलेली गाणी आजही लोकांच्या ओठावर आहेत. भोसले यांनी विविध भारतीय भाषांमध्ये १२,००० हून अधिक गाणी रेकॉर्ड केली. मीना कुमारी, मधुबाला आणि झीनत अमान यांच्यापासून ते काजोल, उर्मिला मातोंडकर आणि पद्मिनी व वैजयंतीमाला यांसारख्या दक्षिण भारतीय अभिनेत्रींसाठीही त्यांनी आपला आवाज दिला.
.jpeg)
