अमरावती

आंध्र प्रदेशमध्ये कोरोना संसर्गाच्या घटना पुन्हा समोर आल्याने आरोग्य प्रशासनाची चिंता वाढली आहे. गेल्या एका महिन्यात राज्यात कोरोनाचे १२ नवीन रुग्ण आढळून आले असून, ४ जणांचा मृत्यू झाला आहे. या आकडेवारीनंतर आरोग्य विभागाने खबरदारीचे पाऊल उचलले आहे.

आरोग्य यंत्रणा सतर्क

राज्य आरोग्य विभागाने दिलेल्या माहितीनुसार, कोरोनाच्या वाढत्या रुग्णसंख्येच्या पार्श्वभूमीवर खबरदारी घेणे गरजेचे आहे. संसर्गाचा प्रसार रोखण्यासाठी चाचण्या वाढवण्याचे आणि मास्क वापरणे, गर्दीच्या ठिकाणी जाणे टाळणे यांसारख्या उपाययोजनांवर भर दिला जात आहे. जे रुग्ण पॉझिटिव्ह आढळले आहेत, त्यांना आवश्यक उपचार दिले जात असून त्यांच्या संपर्कात आलेल्या व्यक्तींचा शोध घेण्यात येत आहे.

आंध्र प्रदेशमध्ये यापूर्वी कोरोनाच्या लाटांमध्ये मोठी रुग्णसंख्या नोंदवण्यात आली होती. आता पुन्हा कोरोनाचे रुग्ण आणि मृत्यूच्या घटना नोंदवल्या गेल्याने, नागरिकांना घाबरून न जाता कोरोना प्रतिबंधक नियमांचे पालन करण्याचे आवाहन प्रशासनाकडून करण्यात आले आहे. विशेषतः ज्येष्ठ नागरिक आणि ज्यांना आधीपासून काही आजार आहेत, अशा व्यक्तींनी अधिक काळजी घ्यावी, असा सल्ला तज्ज्ञांनी दिला आहे.