देशाच्या राजधानीसह संपूर्ण उत्तर भारत सध्या कडाक्याच्या थंडीचा सामना करत आहे. भारतीय हवामान विभागाने (आयएमडी) सोमवारसाठी दिल्ली आणि आसपासच्या परिसरात थंडीच्या लाटेचा (कोल्ड वेव्ह) इशारा दिला आहे. तापमानात सातत्याने घट होत असून नागरिकांना बोचऱ्या थंडीचा सामना करावा लागत आहे. येत्या २४ तासांत उत्तर आणि वायव्य भारतातील हवामानात मोठे बदल अपेक्षित आहेत.
पंजाब, हरियाणा, चंदीगड आणि उत्तर प्रदेशच्या अनेक भागांत पहाटे आणि रात्रीच्या वेळी अत्यंत दाट धुके पडण्याची शक्यता आहे. या धुक्यामुळे दृश्यमानता (व्हिजिबिलिटी) ५० मीटरपेक्षाही कमी होऊ शकते. यामुळे रस्ते, रेल्वे आणि हवाई वाहतुकीवर परिणाम होण्याची भीती व्यक्त करण्यात आली आहे. हवामान विभागाने या राज्यांत धुक्याबाबत 'ऑरेंज अलर्ट' जारी केला आहे. राजस्थान आणि बिहारच्या काही भागातही दाट धुके आणि थंडीचा कडाका कायम राहील.
उत्तर भारतातून वाहणाऱ्या थंड वाऱ्यांमुळे दिल्लीतील किमान तापमान ३ ते ४ अंश सेल्सिअसपर्यंत खाली येण्याचा अंदाज आहे. राजस्थानमधील सीकर आणि चुरू यांसारख्या ठिकाणी तापमान गोठबिंदूच्या जवळ पोहोचले आहे. पहाटेच्या वेळी थंडीचा जोर अधिक असेल. लोकांनी अत्यावश्यक काम असेल तरच घराबाहेर पडावे आणि उबदार कपड्यांचा वापर करावा, असे आवाहन प्रशासनाकडून करण्यात आले आहे.
एकीकडे उत्तरेत थंडीची लाट असताना, दुसरीकडे दक्षिण भारतात पावसाची शक्यता वर्तवण्यात आली आहे. तमिळनाडू, पुडुचेरी, कराईकल, केरळ आणि माहे या ठिकाणी हलका ते मध्यम पाऊस पडू शकतो. लक्षद्वीपमध्येही काही ठिकाणी पावसाच्या सरी कोसळतील. मात्र, मध्य भारत आणि महाराष्ट्रातील हवामान कोरडे राहील आणि थंडीचा कडाका कायम असेल.
.webp "पश्चिम बंगालमधील हुगळी जिल्ह्यातील दादपूर येथील पोइनानमध्ये पार पडलेल्या जागतिक इज्तेमातील दृश्य")
.jpg "प्रातिनिधिक फोटो")
