सौदी अरेबियाने वैद्यकीय तंत्रज्ञानात मोठी झेप घेतली आहे. जगातील पहिला कृत्रिम बुद्धिमत्ता (AI) डॉक्टर दवाखाना येथे सुरू झाला आहे. एप्रिलमध्ये पूर्व प्रांतातील अल-अहसा शहरात हा प्रयोगात्मक दवाखाना सुरू झाला. वैद्यकीय इतिहासातील हा एक महत्त्वाचा टप्पा मानला जात आहे. शांघायस्थित सिनी AI या वैद्यकीय तंत्रज्ञान कंपनी आणि सौदी अरेबियाच्या अलमूसा हेल्थ ग्रुप यांच्या सहकार्याने हा उपक्रम राबवला जात आहे.
AI डॉक्टर
या दवाखान्यात रुग्ण प्रथम AI डॉक्टर ‘डॉ. हुआ’ यांना भेटतात. टॅबलेटद्वारे हा डॉक्टर डिजिटल सल्ला देतो. रुग्ण आपली लक्षणे सांगतात. त्यानंतर डॉ. हुआ संबंधित प्रश्न विचारतो. मानवी कर्मचाऱ्यांच्या मदतीने हृदयरेखाचित्र आणि क्ष-किरण यांसारखी माहिती गोळा करतो.
या माहितीच्या आधारे डॉ. हुआ उपचार योजना तयार करतो. मानवी डॉक्टर ही योजना तपासतो आणि मंजूर करतो. रुग्णाला प्रत्यक्ष भेटण्याची गरज पडत नाही. जटिल किंवा आपत्कालीन प्रकरणांमध्ये मानवी डॉक्टर तातडीने हस्तक्षेप करतात. AI च्या मर्यादेपलीकडील प्रकरणे ते हाताळतात.
सिनी AI कंपनी मानवी डॉक्टरांना ‘सुरक्षा रक्षक’ म्हणते. हे डॉक्टर निदान आणि उपचार प्रक्रियेची देखरेख करतात. “AI दवाखाना हा वैद्यकीय सेवेचा एक नाविन्यपूर्ण नमुना आहे,” असे कंपनीने आपल्या निवेदनात म्हटले आहे. “AI डॉक्टर स्वतंत्रपणे रुग्णांशी संवाद साधतात आणि उपचार सुचवतात. मानवी डॉक्टर निदान आणि उपचारांचे परिणाम तपासतात,” असे कंपनीने स्पष्ट केले.
सिनी AI चे मुख्य कार्यकारी अधिकारी झांग शाओदियान यांनी सांगितले की, कंपनीच्या तंत्रज्ञानाची चूक होण्याची शक्यता ०.३ टक्क्यांपेक्षा कमी आहे. “यापूर्वी AI डॉक्टरांना सहाय्य करायचे. आता आम्ही अंतिम पाऊल उचलले आहे. AI आता थेट निदान आणि उपचार करेल,” असे ते म्हणाले.
चीनमधील यशानंतर सौदीत विस्तार
सिनी AI साठी हा पहिला आंतरराष्ट्रीय विस्तार आहे. २०१६ मध्ये स्थापन झाल्यापासून कंपनीने चीनमधील ८०० हून अधिक रुग्णालये, दवाखाने आणि वैद्यकीय संस्थांशी सहकार्य केले आहे. टेन्सेंट आणि जीजीव्ही कॅपिटल यांसारख्या मोठ्या गुंतवणूकदारांचा पाठिंबा कंपनीला आहे. कृत्रिम बुद्धिमत्तेचा वापर करून वैद्यकीय माहिती व्यवस्थापन आणि संशोधन वाढवण्याचे कंपनीचे उद्दिष्ट आहे.
.jpg "प्रातिनिधिक फोटो")
.jpg "भारत-पाकिस्तान सीमेवर बाबा चमलियाल यांचा उत्सव")
.jpg "प्रातिनिधिक चित्र")
