आवाज द व्हॉइस, गुवाहाटी

आसामच्या बोडो लोकसंस्कृतीचे वैभव असलेल्या 'बागुम्रुबा' नृत्याने शनिवारी (१७ जानेवारी २०२६) गुवाहाटीच्या सूसजई येथील अर्जुन भोगेश्वर बरुआ क्रीडा संकुलात इतिहास रचला. 'बागुम्रुबा द्हौ २०२६' या भव्य सांस्कृतिक कार्यक्रमात पंतप्रधान नरेंद्र मोदी यांच्या उपस्थितीत १०,००० हून अधिक कलाकारांनी एकाच वेळी हे नृत्य सादर केले. ख्राम (ढोल) आणि चिफुंग (बासरी) यांच्या सुरावटींनी संपूर्ण परिसर दुमदुमून गेला होता.

दोन दिवसांच्या आसाम दौऱ्यावर आलेल्या पंतप्रधान मोदींनी या कार्यक्रमाचे कौतुक करताना म्हटले की, "हा सोहळा बोडो समुदायाची महान संस्कृती साजरी करणारा आहे. केंद्र आणि आसाममधील एनडीए सरकार 'बोडोफा' उपेंद्रनाथ ब्रह्मा यांचे स्वप्न पूर्ण करण्यासाठी सातत्याने काम करत आहे." उपेंद्रनाथ ब्रह्मा हे बोडो समुदायाचे थोर नेते होते, ज्यांना बोडो समाजाचे पालक मानले जाते. या सोहळ्यात राज्यपाल लक्ष्मण प्रसाद आचार्य आणि मुख्यमंत्री हिमंत विश्व शर्मा यांनीही सहभाग घेतला.

काय आहे 'बागुम्रुबा' नृत्याचे महत्त्व?

'बागुम्रुबा' हे आसाममधील बोडो समुदायाचे पारंपारिक लोकनृत्य आहे. निसर्ग आणि मानवी जीवन यांच्यातील समन्वयाचे हे प्रतीक मानले जाते. हे नृत्य प्रामुख्याने बोडो नववर्ष (बौइसागु) आणि डोमाशी यांसारख्या सणांच्या वेळी सादर केले जाते. या नृत्यात महिला कलाकार फुलपाखरे, पक्षी, पाने आणि फुले यांची नक्कल करत अत्यंत मोहक हालचाली करतात, तर पुरुष विविध वाद्ये वाजवून त्यांना साथ देतात. या कार्यक्रमात वापरलेल्या अनेक बोडो वाद्यांना 'जीआय टॅग' (GI Tag) मिळालेला आहे.

प्रचंड तयारी आणि प्रशिक्षण

या ऐतिहासिक कार्यक्रमासाठी आसाममधील २३ जिल्ह्यांतील ८१ विधानसभा मतदारसंघांतील कलाकार एकत्र आले होते. सुमारे ४०० मास्टर ट्रेनर्सनी या १०,००० कलाकारांना सराव करून घेतला होता. आसाम सरकारने याआधी बिहू आणि झुमुर नृत्यांचेही अशाच प्रकारचे भव्य सादरीकरण केले होते, ज्याचे पंतप्रधान मोदींनी कौतुक केले होते.

रोड-शो आणि विकासकामांची भेट

पंतप्रधान मोदींचे गुवाहाटीत आगमन होताच त्यांनी ४ किलोमीटर लांबीच्या भव्य रोड-शोमध्ये भाग घेतला. 'मोदीजी जिंदाबाद' आणि 'भारत माता की जय'च्या घोषणांनी गुवाहाटीचे रस्ते दुमदुमून गेले होते. आपल्या या दौऱ्यात पंतप्रधान मोदी सुमारे ७,००० कोटी रुपयांच्या विविध विकास प्रकल्पांचे उद्घाटन आणि पायाभरणी करणार आहेत.

पहिली वंदे भारत स्लीपर ट्रेन आणि इतर प्रकल्प

पंतप्रधानांनी शनिवारी पश्चिम बंगालच्या मालदा येथून देशातील पहिल्या 'वंदे भारत स्लीपर' ट्रेनचे उद्घाटन केले. ही ट्रेन कामाख्या (गुवाहाटी) आणि हावडा दरम्यान धावणार असून १४ तासांत ९७२ किलोमीटरचे अंतर पार करेल. याशिवाय, रविवारी पंतप्रधान काझीरंगा राष्ट्रीय उद्यानातील 'उन्नत प्राणी मार्गिकेची' पायाभरणी करतील आणि ब्रह्मपुत्रा नदीच्या खालून जाणाऱ्या रेल्वेमार्गासह चौपदरी रस्त्याचीही घोषणा करतील.