ED Raids Kerala : केरळचे माजी मुख्यमंत्री पिनाराई विजयन यांच्या घरावर EDचा छापा

Story by आवाज़ मराठी | Published by Bhakti Chalak • 6 h ago

प्रातिनिधिक फोटो

अंमलबजावणी संचालनालयाने (ED) बुधवारी केरळचे माजी मुख्यमंत्री पिनाराई विजयन यांच्या तिरुवनंतपुरम येथील निवासस्थानासह इतर काही ठिकाणी मोठे छापे टाकले आहेत. विजयन यांच्या मुलीशी संबंधित सीएमआरएल (CMRL) मनी लाँड्रिंग प्रकरणाच्या चौकशीचा भाग म्हणून ही कारवाई करण्यात आल्याची माहिती अधिकृत सूत्रांनी दिली आहे.

केंद्रीय तपास यंत्रणेच्या पथकांनी राज्यभरातील एकूण १० ठिकाणांवर एकाच वेळी शोधमोहीम सुरू केली आहे. यामध्ये ८१ वर्षीय माजी मुख्यमंत्री विजयन यांच्या राजधानीतील भाड्याच्या घरासह कन्नूर येथील ठिकाण आणि 'कोचीन मिनरल्स अँड रुटाईल लिमिटेड' (CMRL) या खाजगी कंपनीच्या मुख्य पदाधिकाऱ्यांच्या घरांचा समावेश आहे. ही संपूर्ण कारवाई प्रिव्हेंशन ऑफ मनी लाँड्रिंग ऍक्ट (PMLA) च्या अंतर्गत केली जात आहे.

विना सेवा १.७२ कोटी रुपयांच्या कथित पेमेंटचा आरोप

माजी मुख्यमंत्री विजयन यांच्या मुलीच्या, म्हणजेच टी. वीणा यांच्या आयटी कंपनीच्या व्यवहारांची चौकशी सुरू असल्याने विजयन यांच्या घरावर हा छापा टाकण्यात आला आहे. २०१७ ते २०२० दरम्यान, सीएमआरएल कंपनीने टी. वीणा यांच्या 'एक्सालॉजिक सोल्यूशन्स' (Exalogic Solutions) या आयटी कंपनीला कोणतीही सेवा न घेता बेकायदेशीरपणे १.७२ कोटी रुपयांचे पेमेंट केल्याचा गंभीर आरोप आहे.

केरळ उच्च न्यायालयाने मंगळवारीच 'सीएमआरएल'ची ईडी कारवाई रद्द करण्याची मागणी करणारी याचिका फेटाळून लावली होती, ज्यामुळे केंद्रीय यंत्रणेला तपास पुढे नेण्याचा मार्ग मोकळा झाला. ईडीने २०२४ मध्ये या प्रकरणी गुन्हा दाखल केला होता.

राजकीय वर्तुळात चर्चांना उधाण

पिनाराई विजयन यांनी यापूर्वी त्यांच्या मुलीवरील हे सर्व आरोप फेटाळून लावले असून, आपली प्रतिमा मलिन करण्यासाठी हे राजकीय कारस्थान रचले गेल्याचा दावा केला होता. नुकत्याच झालेल्या केरळ विधानसभा निवडणुकीत काँग्रेस प्रणित 'यूडीएफ'ने (UDF) विजय मिळवल्यानंतर डाव्या आघाडीचे (CPI-M) ज्येष्ठ नेते असलेले विजयन सत्तेतून बाहेर झाले आहेत. २०१६ ते २०२६ अशी सलग दोन टर्म मुख्यमंत्री राहिलेले विजयन आता केरळ विधानसभेचे विरोधी पक्षनेते आहेत.

केंद्रीय कॉर्पोरेट व्यवहार मंत्रालयाची तपास शाखा असलेल्या 'सिरियस फ्रॉड इन्व्हेस्टिगेशन ऑफिस'ने (SFIO) दाखल केलेल्या तक्रारीवरून ईडीचा हा तपास सुरू आहे. आयकर विभागाच्या अंतरिम सेटलमेंट बोर्डाने सीएमआरएल कंपनीच्या काही संशयास्पद आर्थिक व्यवहारांवर प्रश्नचिन्ह उपस्थित केल्यानंतर हे संपूर्ण प्रकरण उघडकीस आले होते.