'ऑपरेशन सिंदूर' दरम्यान पाकिस्तानच्या लष्करप्रमुखांना "भारतावर हल्ला करा" असे चिथावणीखोर आवाहन करणाऱ्या एका महिलेला गुजरात एटीएसने (ATS) अटक केली आहे. अल-कायदा या दहशतवादी संघटनेचा अजेंडा पसरवण्याच्या आरोपाखाली शमा परवीन अन्सारी नावाच्या या महिलेला अटक करण्यात आली असून, ती 'प्रोजेक्ट खिलाफत' अंतर्गत मुस्लीम राष्ट्रांना एकत्र करण्याचे आवाहन करत होती, अशी माहिती अधिकाऱ्यांनी दिली आहे.
गुजरात एटीएसने दिलेल्या माहितीनुसार, २९ जुलै रोजी शमा अन्सारीला बंगळूरू येथील तिच्या घरातून अटक करण्यात आली. ती बंदी घातलेल्या 'अल-कायदा इन इंडियन सबकॉन्टिनेंट' (AQIS) या संघटनेचा सोशल मीडिया पेजेसवरून प्रचार करत होती. तिचे दोन फेसबुक पेज आणि एक इंस्टाग्राम हँडल असून, त्यावर सुमारे १०,००० फॉलोअर्स होते. या माध्यमांतून ती चिथावणीखोर, जिहादी आणि भारतविरोधी मजकूर शेअर करत होती.
भारताने पाकिस्तान आणि पाकव्याप्त काश्मीरमधील दहशतवादी तळांवर 'ऑपरेशन सिंदूर' सुरू केल्यानंतर दोनच दिवसांनी, म्हणजेच ९ मे रोजी, शमा अन्सारीने तिच्या फेसबुक अकाउंटवर एक पोस्ट टाकली होती. यात तिने पाकिस्तानचे लष्करप्रमुख जनरल असीम मुनीर यांचा फोटो वापरून भारतावर हल्ला करण्याची "सुवर्णसंधी" असल्याचे म्हटले होते.
एटीएसने जारी केलेल्या प्रसिद्धीपत्रकानुसार, तिने लिहिले होते, "तुमच्याकडे सुवर्णसंधी आहे... इस्लामच्या अंमलबजावणीसाठी 'प्रोजेक्ट खिलाफत' स्वीकारा, मुस्लीम भूमी एकत्र करा आणि हिंदुत्व व झिओनिझम संपवण्यासाठी पुढे व्हा..."
याशिवाय, शमाच्या इंस्टाग्राम अकाउंटवर शेअर केलेल्या एका व्हिडिओमध्ये एक कट्टरपंथी मौलवी भारतीय लष्कराला पाठिंबा दिल्याबद्दल भारतीय मुस्लिमांवर टीका करताना दिसत आहे. दुसऱ्या एका व्हिडिओमध्ये लाहोरच्या लाल मशिदीचा इमाम अब्दुल अझीझ भारतात सशस्त्र क्रांती करून 'खिलाफत' व्यवस्था स्थापन करण्याबद्दल चिथावणीखोर विधाने करत आहे.
तिसऱ्या एका व्हिडिओमध्ये AQIS चा एक नेता 'गझवा-ए-हिंद'बद्दल बोलत असून, भारतीय राज्याविरोधात, विशेषतः हिंदू समुदाय आणि लोकशाही संस्थांना लक्ष्य करून हिंसाचार घडवण्याचे आवाहन करत असल्याचे एटीएसने म्हटले आहे.
दोन आठवड्यांपूर्वी अशाच प्रकारे चिथावणीखोर मजकूर पसरवणाऱ्या ज्या चार जणांना अटक करण्यात आली होती, त्यांच्यापैकी एकाशी शमा अन्सारी संपर्कात होती. या पाचही जणांवर बेकायदेशीर हालचाली (प्रतिबंध) कायद्याच्या (UAPA) विविध कलमांनुसार गुन्हा दाखल करण्यात आला आहे.
