सध्याच्या काळात सोशल मीडियावर अनेकदा नकारात्मक चर्चा पाहायला मिळतात, पण काही व्हिडिओ असे असतात जे थेट काळजाला भिडतात आणि माणुसकीवरचा विश्वास अधिक दृढ करतात. असाच एक अत्यंत सुंदर आणि हृदयस्पर्शी व्हिडिओ सध्या समोर आला आहे. सौदी अरेबियातील मक्का या मुस्लिमांच्या पवित्र तीर्थस्थळी उमराहसाठी गेलेल्या एका भारतीय व्यक्तीने केंद्रीय अल्पसंख्याक व्यवहार मंत्री किरेन रिजिजू (Kiren Rijiju) यांच्यासाठी खास प्रार्थना (दुआ) केली आहे. हा व्हिडिओ पाहून खुद्द मंत्री महोदयही भारावून गेले आहेत.

पवित्र काबासमोर उभे राहून प्रार्थना

सोशल मीडियावर व्हायरल झालेल्या या व्हिडिओमध्ये एक भारतीय व्यक्ती मक्का येथील पवित्र 'काबा' समोर उभी असल्याचे दिसत आहे. पांढऱ्या शुभ्र कपड्यांमध्ये (इहराम) असलेला हा यात्रेकरू अत्यंत श्रद्धेने आणि मनापासून बोलताना दिसतो.

व्हिडिओमध्ये तो म्हणतो, "अल्लाहने मला उमराह करण्याची ही पवित्र संधी दिली आहे. मी मक्का शरीफमध्ये आलो आहे आणि आमचे मंत्री रिजिजू साहेब यांच्यासाठी प्रार्थना करणार नाही, हे अशक्य आहे."

केवळ मंत्र्यांसाठीच नाही, तर या व्यक्तीने आपल्या देशासाठीही प्रार्थना केली. तो पुढे म्हणतो, "मी अल्लाहकडे दुआ (प्रार्थना) करतो की, रिजिजू साहेब असेच जनतेची सेवा करत राहोत. त्यांचे सर्व प्रयत्न यशस्वी आणि फलदायी ठरोत. तसेच आमच्या भारत देशात शांतता, अमन आणि प्रगती नांदो, हीच ईश्वरचरणी प्रार्थना."

किरेन रिजिजू यांची भावूक प्रतिक्रिया

اللہ آپ کو سلامت رکھے۔ مکہ مکرمہ میں میرے لیے یہ سب سے زیادہ دل کو چھو لینے والی دعا کے لیے آپ کا بہت بہت شکریہ۔ pic.twitter.com/upKd7fqvjz

— Kiren Rijiju (@KirenRijiju) December 14, 2025

आपल्यासाठी हजारो किलोमीटर दूरवरून, तेही इतक्या पवित्र स्थानावरून कोणीतरी प्रार्थना करत आहे, हे पाहून केंद्रीय मंत्री किरेन रिजिजू अत्यंत भावूक झाले. त्यांनी हा व्हिडिओ आपल्या अधिकृत 'एक्स' (पूर्वीचे ट्विटर) हँडलवर शेअर केला आहे.

व्हिडिओ शेअर करताना त्यांनी या यात्रेकरूचे मनापासून आभार मानले आहेत. रिजिजू यांनी आपल्या पोस्टमध्ये लिहिले, "अल्लाह तुम्हाला सुरक्षित ठेवो. मक्का मुकर्रमा सारख्या पवित्र ठिकाणी माझ्यासाठी केलेल्या या अत्यंत हृदयस्पर्शी प्रार्थनेबद्दल तुमचे खूप खूप आभार."

सोशल मीडियावर कौतुकाचा वर्षाव

हा व्हिडिओ आणि मंत्र्यांची प्रतिक्रिया सोशल मीडियावर वेगाने व्हायरल होत आहे. नेटकरी यावर प्रेमाचा वर्षाव करत आहेत. राजकारण आणि धर्माच्या भिंतींपलीकडे जाऊन जेव्हा एक सामान्य नागरिक आपल्या नेत्यासाठी प्रार्थना करतो आणि नेता तितक्याच नम्रपणे त्याचा स्वीकार करतो, तेव्हा लोकशाहीतील हे नाते अधिक घट्ट होते, अशा प्रतिक्रिया लोक देत आहेत.