भारताचे परराष्ट्र मंत्री एस. जयशंकर यांनी जमैकाचे पंतप्रधान अँड्र्यू होलनेस यांची भेट घेतली असून, दोन्ही देशांमधील राजकीय, आर्थिक आणि लोकांमधील परस्पर सहकार्य वाढवण्यावर सविस्तर चर्चा केली. यावेळी जयशंकर यांनी पंतप्रधान नरेंद्र मोदी यांच्या वतीने जमैकाच्या पंतप्रधानांना शुभेच्छा दिल्या.

या भेटीदरम्यान, परराष्ट्र मंत्री जयशंकर यांनी भारताच्या वतीने जमैकाला १० 'भीष्म क्युब्स' (BHISHM - Bharat Health Initiative for Sahyog Hita & Maitri) भेट म्हणून दिले. यावेळी जमैकाचे आरोग्य मंत्री ख्रिस्तोफर टफ्टन आणि परराष्ट्र मंत्री कामिना जे स्मिथ उपस्थित होते.

आपत्कालीन वैद्यकीय व्यवस्थेसाठी 'भीष्म क्युब'

यासंदर्भात माहिती देताना जयशंकर यांनी 'एक्स' (X) या सोशल मीडिया प्लॅटफॉर्मवर पोस्ट शेअर केली आहे. "भीष्म क्युब ही एक फिरती रुग्णालय प्रणाली असून, ती जलद गतीने तैनात करण्यासाठी तयार करण्यात आली आहे. आपत्ती आणि आणीबाणीच्या काळात जमैकाला याची मोठी मदत होईल. ही भेट दोन्ही देशांमधील मैत्री, आपत्ती व्यवस्थापनासाठी असलेली बांधिलकी आणि नाविन्यपूर्ण तंत्रज्ञानाचे प्रतीक आहे," असे ते म्हणाले.

जयशंकर हे जमैका, सुरीनाम आणि त्रिनिदाद अँड टोबॅगो या तीन देशांच्या नऊ दिवसांच्या दौऱ्यावर असून, शनिवारी संध्याकाळी ते पहिल्या टप्प्यात किंग्स्टन येथे पोहोचले. कॅरिबियन देशांसोबत भारताचे धोरणात्मक आणि सांस्कृतिक संबंध अधिक मजबूत करणे हा या दौऱ्याचा मुख्य उद्देश आहे. या दौऱ्यादरम्यान त्यांनी भारतीय वंशाच्या नागरिकांशीही संवाद साधला आणि पायाभूत सुविधा, मानवी विकास आणि तंत्रज्ञान-आधारित प्रशासनातील भारताच्या प्रगतीबाबत चर्चा केली.

क्रिकेटच्या माध्यमातून मैत्रीचे बंध

भारत आणि जमैका यांच्यातील क्रिकेटचे नाते अधोरेखित करत भारताने किंग्स्टन येथील सबिना पार्कसाठी एक स्कोअरबोर्डही भेट दिला आहे. सबिना पार्क हे जमैका क्रिकेट संघाचे घरचे मैदान असून कॅरिबियन बेटांवरील हे एकमेव कसोटी क्रिकेट मैदान आहे. हा नवीन स्कोअरबोर्ड दोन्ही देशांमधील कायमस्वरूपी मैत्रीचे प्रतीक असलेल्या अनेक संस्मरणीय डावांचा साक्षीदार बनेल, अशी आशा जयशंकर यांनी व्यक्त केली.

वेस्ट इंडीज क्रिकेट संघाचा भाग असलेल्या जमैका आणि भारत यांच्यात क्रिकेट हा एक महत्त्वाचा सांस्कृतिक दुवा राहिला आहे. ख्रिस गेल, कोर्टनी वॉल्श आणि मायकल होल्डिंग यांसारख्या जमैकन खेळाडूंनी आंतरराष्ट्रीय स्तरावर वेस्ट इंडीज क्रिकेटचा दबदबा निर्माण करण्यात मोठी भूमिका बजावली आहे.